Aqtóbede JRVI juqtyrǵandardyń kóbi balalar

Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Indıra Aıaǵanovanyń aıtýynsha, qazir COVID-19 ınfektsııasynyń jańa tolqyny bastaldy dep qorqýdyń qajeti joq. Bıyl Aqtóbede aýrýdyń bul túri múlde tirkelmedi. Alaıda JRVI juqtyrǵandar sany 110 myńnan asty.

- Jyl basynan beri Aqtóbe oblysynda jiti respıratorlyq vırýstyq ınfektsııa boıynsha 110 416 jaǵdaı tirkeldi. Olardyń 62 paıyzy 14 jasqa deıingi balalar arasynda anyqtaldy. JRVI – tumaý emes. Tumaý tek zerthanalyq ádistermen rastalady. Naýqasty klınıkalyq jaǵdaıyna qaraı ǵana aýrýhanaǵa jatqyzady. Aqtóbe oblysy boıynsha qazirgi ýaqytta statsıonarlyq em alýshylar joq. Immýndaý naýqany 15 qyrkúıekten bastalady. Bıyl jergilikti bıýdjet qarajaty esebinen óńir turǵyndarynyń 15 paıyzyn qamtý josparlanyp otyr,- dedi Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Indıra Aıaǵanova.

Elimiz boıynsha aldymen medıtsına qyzmetkerleri, medıtsınalyq uıymdarda baqylaýda turǵan balalar, jetim jáne ata-anasynyń qamqorlyǵynsyz qalǵan balalarǵa arnalǵan bilim berý uıymdarynda oqıtyn, tárbıelenetin jetkinshikter vaktsına qabyldaıdy. Bul tizimde qarttar úıiniń qyzmet alýshylary, múgedektigi bar adamdar da bar.

- QR Bas memlekettik sanıtarııalyq dárigeriniń qaýlysyna sáıkes 1 qazannan bastap medıtsınalyq uıymdarda medıtsına qyzmetkerleri úshin maska kııý rejımin engizý kózdelgen. Bul talap jappaı maska taǵý rejımi engiziledi degendi bildirmeıdi. Eń mańyzdy másele – epıdemıologııalyq jaǵdaıdy baqylaý jáne profılaktıkalyq sharalardyń ýaqtyly júrgizilýi. Qazirgi ýaqytta COVID-19 boıynsha «jańa tolqyny bastalady» dep alańdaýǵa eshqandaı negiz joq, jaǵdaı turaqty baqylaýda,- dedi Indıra Aıaǵanova.

Aıta keteıik, ShQO-da tumaýmen aýyrǵandar sany 5 esege jýyq artqan. Tumaýǵa qarsy ekpe saldyrý naýqany 15 qyrkúıekte bastalady.