Aqtóbede jospardan tys tekserý kezinde zańsyz qurylys nysandary anyqtaldy
AQTÓBE. KAZINFORM – Byltyr jospardan tys 61 tekserý júrgizildi. Turǵyn úı, meıramhana men dúkendi ruqsatsyz salǵandardyń isi sotqa joldandy.
Aqtóbe oblystyq memlekettik sáýlet-qurylys baqylaý basqarmasyna byltyr zańdy jáne jeke tulǵalardan, memlekettik organdardan myńnan astam aryz tústi. Nátıjesinde jospardan tys 61 tekserý júrgizildi. Barlyǵy 119 ákimshilik hattama toltyrylyp, 50 mln teńgeden astam aıyppul salyndy.
- Arnaıy monıtorıngtik top qujaty rásimdelmegen qurylys nysandaryn tekserip, akt toltyrady. Aqtóbe oblystyq memlekettik sáýlet-qurylys baqylaý basqarmasy sol kezde jospardan tys tekserý júrgizedi. Zańsyz salynǵan qurylys qalada az emes. Olardyń ishinde azyq-túlik dúkeni, meıramhana, turǵyn úıdi de zańsyz turǵyza bastaǵan. Turǵyn úıdi qaladaǵy Zarechnyı turǵyn alabynda sala bastap, tipti eki qabatyn kóterip qoıǵan. Birde-bir qujaty tapsyrylmady. Qurylys ıelerin shaqyrǵanymyzben, habarsyz qaldy. Kelmegen soń sotqa júgindik. Qazir is sotta qaralyp jatyr. Byltyr 61 tekserý kezinde 20-ǵa jýyq nysannyń zańsyz salynǵany belgili boldy. Bári kommertsııalyq nysan,- dedi Aqtóbe oblystyq memlekettik sáýlet-qurylys baqylaý basqarmasynyń basshysy Sultan Amanchın.
Sondaı-aq Aqtóbede oblystyq memlekettik sáýlet-qurylys baqylaý basqarmasy men oblys prokýratýrasy birlesip, merdigerlerdi tekserdi. Byltyr 37 merdigerdiń qyzmeti 6 aıǵa toqtap turdy. Al bireýi lıtsenzııasynan aıyryldy.
Aıta keteıik, Almaty qalasynda zańsyz qurylys jıi anyqtalady. Bıyl qańtarda Osıpenko kóshesinde ornalasqan irgetas ústine metall qurylymnan salynǵan qosymsha qurylys buzyldy. Bul týraly Almatynyń qala qurylysy baqylaý basqarmasynyń mamandary aıtty.
