Aqtóbede josyqsyz merdigerdi tizimge engizbegen memlekettik qyzmetshiler jazalanady

AQTÓBE. KAZINFORM – Tizimge enbegen kásipkerler qaıtadan Memlekettik satyp alý konkýrsyna qatysyp, 8, 11 ret jeńimpaz atanǵan. Ádep keńesi sheneýnikterdi qyzmetine tolyq saı emes dep daýys berdi.

Ádep jónindegi keńeste Shalqar aýdandyq ishki saıasat bóliminiń basshysy Nursultan Qanıatov, Shalqar aýdandyq kásipkerlik jáne aýyl sharýashylyǵy bóliminiń basshysy Marǵulan Dosjanov, Eset Kótibaruly aýyldyq okrýginiń ákimi Mıramǵalı Kenjalınge qatysty tártiptik is qaraldy. Úsheýi de josyqsyz merdigerdi tizimge qospaı, kásipkerlerdiń ári qaraı da memlekettik tapsyrys oryndaýyna jol ashyp bergen.

- Memlekettik jáne kvazımemlekettik sektor sýbektileriniń 2024-2025 jyldardaǵy Memlekettik satyp alý konkýrstary qaraldy. Júktelgen mindettemelerdiń oryndalýyna taldaý júrgizdi. Taldaý barysynda birqatar zańbuzýshylyq anyqtaldy. «Memlekettik satyp alý týraly» Zańǵa sáıkes eger merdiger óz jumysyn durys atqarmasa is sotqa berilip, josyqsyz dep tanylady. Sot sheshimi zańdy kúshine engennen keıin úsh jumys kúninde josyqsyz kompanııalar tizimine engiziledi. Taldaý barysynda ýákiletti organdarǵa tıisti aqparat joldanbaǵany anyqtaldy. Shalqar aýdandyq kásipkerlik jáne aýyl sharýashylyǵy bólimi «Dobrovka» jeke kásipkerin tizimge engizbegen soń kompanııa qaıta Memlekettik satyp alý konkýrsyna qatysyp, 11 lot boıynsha jeńimpaz atanǵan. Shalqar aýdandyq ishki saıasat bóliminiń basshysy dál osylaı kásipkerdiń 8 ret memlekettik satyp alý konkýrsyna qatysyp, jeńimpaz bolýyna kedergi keltirmegen,- dedi Shalqar aýdandyq prokýrory Nurbolat Qatýov.

Ádep keńesi kezinde Shalqar aýdanyndaǵy eki bólim basshysyn qyzmetine tolyq saı emes túrinde tártiptik jazaǵa tartý usynyldy. Al Eset Kótibaruly aýyldyq okrýgi ákimi Mıramǵalı Kenjalınge qatysty tártiktik is toqtatyldy.

- Aqtalýǵa kelmeıtin nárse. Sebebi bul degen bıýdjet qarajaty. Bıýdjettiń qarajaty bolǵan soń onyń 1 tıynynyń da quny bar. Óıtkeni sol qarjynyń bárin halyq kútip otyr. Kásipkerler mindettemelerin oryndamasa memlekettik satyp alýǵa qatysýǵa múlde quqyqtary joq,- dedi Ádep keńesiniń tóraǵasy Aıbek Shilmanov.

Eske salsaq, buǵan deıin Ádep keńesinde Agroónerkásiptik keshendegi memlekettik ınspektsııa komıtetiniń Aqtóbe qalalyq aýmaqtyq ınspektsııasynyń basshysy Erlan Ibrashevke qatysty is qaraldy. Ol áriptesimen sózge kelip, ekijúzdi dep aıtqanyn moıyndady.