Aqtóbede jóndeý jumysyna 84 mln teńge jumsalǵan býlvardyń kem-ketigi kóp

AQTÓBE. QazAqparat – Aqtóbe qalasynyń ortalyǵyndaǵy sýly-jasyldy býlvar - turǵyndar jıi baratyn demalys ornynyń biri. 84 mln teńgege jóndeýden ótken oryn qazir qaıta búlingen, dep habarlaıdy QazAqparat tilshisi.

Aqtóbe qalasy ákiminiń baspasóz qyzmetiniń habarlaýynsha, 2021 jyly Sýly-jasyl býlvardy abattandyrýǵa 84,4 mln teńge bólinip, jumsaldy.

Jóndeý jumysyn «Nýr-Ber 2006» JShS-i atqardy.

«Kelisimshart negizinde «Shańyraq» jáne Ábilqaıyr han dańǵyly jaǵynan býlvarǵa kiris bóligindegi nysannyń syrtqy jabyndylaryn qaıta qalpyna keltirý, «Rotonda» jáne «Shańyraq» nysandaryndaǵy túsken qysh taqtaıshalaryn qalpyna keltirý, «Rotonda» nysanyndaǵy áripterdi qalpyna keltirý, terrasa ústindegi oryndyqtaryn qalpyna keltirý jáne jan-jaǵyn sylaý, trıbýna oryndyqtaryn qalpyna keltirý, jaryq shamdaryn ornatý, trotýar salý sekildi jumystar júrgizildi.2022 jyly «Rotonda» nysanyndaǵy áripter qaıta túsip, kelisimsharttyń kepildik mindettemeleri negizinde qaıta qalpyna keltirildi», - deıdi Aqtóbe qalasy ákiminiń baspasóz hatshysy Aıgúl Baımenova.

Al bıyl munda senbilik júrgizilip, búlingen, synǵan dúnıelerdi retteý jumysy jalǵasady. Biraq oǵan kimniń jaýapty ekeni belgisiz. Sebebi merdiger mekemeniń kepildik ýaqyty aıaqtaldy.

Sonymen birge sýly-jasyldy býlvarda sýburqaqtar jaramsyz kúıge túsken. Ony qalpyna keltirýdi mindetine alǵan merdiger – «Shalqar Bastaý» JShS.

Tapsyrys berýshi kepildik merzimi aıasynda qaıta jóndeýdi talap etip, sotqa júgindi.