Aqtóbede jolǵa tóselgen qıyrshyq tastan emes, qumnan synama alynady

AQTÓBE. KAZINFORM — Qıyrshyq tas zaýyttan shyqqan ónim. Tabıǵat janashyrlarynyń shaǵymynan soń ekologtar kóktemde qumnan synama alýdy josparlap otyr.

Aqtóbe qalasynda jol salynbaǵan, biraq qatynasy qıyn kóshelerge ferroqorytpa zaýytynan shyqqan ónim tóseldi. Keıingi jyldary qala mańyndaǵy aýyldarda ǵana emes, qalanyń qıylys kóshelerine de óndiris ornynan shyqqan tas jetkizildi. Ekologtar zerthanalyq synama qujaty bar ári ónim retinde tirkelgen tastyń quramynda zııandy zattyń bar nemese joq ekenin teksere almaı otyr.

— Qazirgi kezde zaýyttan alynyp jatqan qıyrshyq tas qaldyq emes, ónim retinde tirkelgen. Bizdegi zerthanada tekserý úshin tek qaldyqtyń ǵana synamasyn ala alamyz. Topyraq, sý jáne atmosferanyń lastanýyn bilýge bolady. Zaýytta qıyrshyq tastyń sertıfıkaty bar. Sondyqtan tastyń quramyn zerttep, baǵa bere almaımyz. Zaýyttyń ózi eýropalyq jáne qazaqstandyq ózge zerthanaǵa synamasyn jiberip, teksertýge jibergen. Qorytyndysyn ózderi de aıta jatar. Ekologııa departamenti qıyrshyq tastyń astyndaǵy topyraqtyń synamasyn alyp, tekserýge jibere alady. Byltyr aýa raıyna baılanysty synama alyp úlgermedik. Bıyl kóktemde osy jumys isteledi. Oǵan tabıǵat janashyrlary men qoǵam belsendilerin de shaqyryp, zaýyt ókilderimen birge synama alýǵa bolady, — dedi Aqtóbe oblystyq ekologııa departamenti basshysynyń orynbasary Talap Usnadın.

Eske salsaq, Aqtóbe qalasynda asfalt tóselmegen kóshelerge ferroqorytpa zaýytynan qıyrshyq tas alynady. Tabıǵat janashyrlary tóselip jatqan tastyń adam densaýlyǵyna zııany bolýy múmkin ekenin aıtyp, ekologtarǵa eskertkenimen, jergilikti ákimdik arnaıy ruqsat qujaty alynǵanyn aıtty.