Aqtóbede jolǵa bólinetin qarjy on esege kóbeıdi
AQTÓBE. QazAqparat - Aqtóbe oblysynda bıyl oblystyq, respýblıkalyq mańyzy bar joldarǵa 60 mıllıard teńgege jýyq qarjy bólinip, ıgeriledi, dep habarlaıdy QazAqparat tilshisi.
Aqtóbedegi respýblıkalyq joldyń 56 paıyzy jaqsy saqtalǵan. Al oblystyq mańyzy bar joldyń 65 paıyzy, aýdandyq mańyzy bar joldyń 16 paıyzy jaramdy. Jyl ótken saıyn jol jóndeýge bólinetin qarjy kólemi artyp keledi.
«2015 jyly 6,2 mıllıard, 2016 jyly 11 mıllıard, 2017 jyly 23 mıllıard teńge bólindi. Al bıyl jolǵa 44,1 mıllıard teńge baǵyttalyp otyr. Oǵan «Aqtóbe-Atyraý» tasjolyna bólinetin 15 mıllıard teńgeni qosamyz. Sonda jolǵa bólinetin qarjy on esege artady»,- dedi Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev.
Aıta keteıik, bıyl «Aqtóbe-Orsk» tasjolynyń qurylysy aıaqtalady. 0-8 shaqyrymy 8 jolaqty bolady.
«Reseı Federatsııasynyń aldyndaǵy ýádemizdi óz ýaqytynda oryndaýymyz kerek. Olar únemi bizge «Aqtóbe-Orsk» jolyn aıtady. Jospar boıynsha úsh jylda jumys aıaqtalýy kerek bolsa, biz eki jylda paıdalanýǵa beremiz. Bıyl 50 km salynady. Sol kezde Chelıabi, Mangıtogorskige jol ashylady»,- dedi Aqtóbe oblysynyń ákimi Berdibek Saparbaev.
Aıta keteıik, Aqtóbede bes joba boıynsha jol qurylysy memlekettik-jekeshelik seriktestik aıasynda salynady. Bıyl 11 mıllıard teńgeniń jumysy júrgiziledi. Quny 2,5 mıllıard teńge bolatyn joba maquldanyp otyr.
«Memlekettik-jekeshelik seriktestik aıasynda 700 mıllıon teńge qarjy únemdeldi. Bul baǵyttaǵy jumysty jalǵastyrý úshin basqarmaǵa taǵy eki adamdy jumysqa alǵymyz keledi. Olar jobalaý jumystaryn júrgizýge septigin tıgizedi. Negizi, mektep, balabaqsha, ákimshilik ǵımarattaryn salǵan kezde qurylys kompanııasyna jol salýdy mindetteý usynylady. Bárin memlekettik-jekeshelik seriktestik aıasynda atqarýǵa bolady»,- dedi A.Osmanǵalıev.
