Aqtóbede joldyń qarsy betine shyǵyp eki kólikti soqqan Daewoo Nexia órtenip ketti
Búgin saǵat 06:00 shamasynda Aqtóbe qalasyndaǵy 312-atqyshtar dıvızııasy dańǵylynyń boıynda Daewoo Nexia avtokóliginiń júrgizýshisi rýldi basqara almaı, qarama-qarsy baǵytqa shyǵyp ketti. Saldarynan Lada Priora jáne Opel Vectra avtokólikterimen soqtyǵysqan.
«Jol-kólik oqıǵasy kezinde Daewoo Nexia avtokóligi oqıǵa ornynda órtenip ketken. Daewoo Nexia avtokóliginiń júrgizýshisi men jolaýshysy jáne Lada Priora avtokóliginiń júrgizýshisi túrli jaraqattarmen Aqtóbe qalasynyń medıtsınalyq jedel járdem aýrýhanasyna jetkizildi», - dedi oblystyq PD baspasóz qyzmetiniń jetekshisi Erbolat Sarqulov.
«Búgin tańerteń aýrýhanaǵa úsh naýqas jetkizildi. Olardyń bireýiniń jaǵdaıy aýyr bolyp, jansaqtaý bólimine jatqyzyldy. Ekinshisi travmatologııa, úshinshisi polıtravma bólimshesine jiberildi. Qazirgi kezde jaǵdaılary turaqty. Tolyq tekserýden soń naqty dıagnozyn aıta alamyz. Eshqaısysyna ota jasalǵan joq. Jaraqat alǵandardyń ekeýi áıel, bireýi er adam», - dedi Jedel járdem aýrýhanasy polıtravma bólimshesiniń travmatolog dárigeri Ádilbek Qarajanov.
