Aqtóbede joldy kútip ustaý talabyn oryndamaǵan laýazymdy tulǵalar jaýapqa tartyldy
AQTÓBE. QazAqparat - Ákimshilik polıtsııa basqarmasynyń jol jáne tehnıkalyq ınspektsııa bólimi qyzmetkerleri tekserý júrgizip, 52 aıyppul salyndy, dep habarlaıdy QazAqparat tilshisi.
Eldi mekenderdegi jolǵa jáne jol qurylystaryna 300-den astam tekserý júrgizildi. Kemshilikterdi joıý úshin 282 uıǵarym berildi. Sondaı-aq laýazymdy tulǵalar joldardy kútip ustaý jónindegi talaptardy oryndamaǵany úshin QR ÁQBK 631-baby boıynsha jaýapqa tartyldy.
«Barlyǵy 52 laýazymdy jáne zańdy tulǵany ákimshilik jaýapqa tartty. Aýa raıy kúrt ózgerip, jolǵa jaýapty merdigerler ýaqtyly qardy tazalamady, ınertti materıal qoldanbady. Jergilikti atqarýshy organdarǵa eskertý berildi. Ákimshilik polıtsııa basqarmasy júrgizýshilerden jol qozǵalysy erejelerin saqtaýdy, qolaısyz aýa raıy jaǵdaıynda asa muqııat bolýdy eskertedi»,- dedi oblystyq PD baspasóz qyzmetiniń jetekshisi Erbolat Sarqulov.
