Aqtóbede joldy bógep tastaǵan satýshylar men ákimdik ortaq mámilege keldi
AQTÓBE. QazAqparat - Aqtóbedegi Ortalyq bazar órt qaýipsizdigi talaptaryna saı qaıta jabdyqtaldy. Bazar ákimshiligi joldy keńeıtip, birneshe gıdrant satyp aldy, dep habarlaıdy QazAqparat tilshisi.
Aqtóbe qalasyndaǵy Ortalyq bazar satýshylary óz saýda oryndarynan aıyrylyp qalmas úshin joldy jaýyp, talaptaryn qoıǵan bolatyn.
Buǵan deıin habarlaǵanymyzdaı, barlyǵy 200 saýda orny jabylyp, qaıta jaraqtandyrý týraly másele qozǵaldy. Sebebi, tótenshe jaǵdaılar qyzmeti órt qaýipsizdigin saqtamaýdyń 32 deregin anyqtady. Arada 20 kún ótkende jumys toby bazarǵa baryp, qorytyndy shyǵardy.
«Órt sóndiretin kólikti bazar ishine kirgizip, onyń kedergisiz qozǵalýy úshin qandaı shara qoldaný kerek ekenin anyqtadyq. Barlyǵy bes esik arqyly bazarǵa kirýge bolady. Al kólik júretin joldyń eni 2,5 metrden 5,3 metrge deıin keńeıdi. Órt qaýipsizdigi erejesiniń buzylýy anyqtalǵan derekterdiń bári eskerilip, qalpyna keltirildi»,- dedi Aqtóbe qalalyq tótenshe jaǵdaılar basqarmasynyń basshysy Aıbolat Jańabergenov.
Ortalyq bazar ákimshiligi uıǵarym boıynsha barlyq talapty oryndady. Tótenshe jaǵdaılar qyzmeti tekserip, bári retke kelgenin aıtty. Órt sóndirý kóliginiń erkin júrýine kedergi keltiretin 19 oryndy alyp, ıelerine bazardyń ózge jerinen oryn berildi. Al aldyńǵy saýda qatarlary bir metrden keıinge ysyryldy. Sol kezde júretin jer aýmaǵy keńeıdi»,- dedi Ortalyq bazar dırektory Elaman Iteǵulov.
Ortalyq bazardaǵy ózgeristi oblys ákiminiń orynbasary Qaırat Bekenov qarap shyqty. Ákimdik Ortalyq bazar basshylyǵyna aldymen adamdardyń ómirine qaýip tóndiretin kedergilerdi joıyp, jumys ornyn túgel saqtaýdy tapsyrǵan bolatyn. Bul tapsyrma tolyq oryndaldy.
«Bazarda 10 jyldan beri saýda jasaımyn. Ózim turǵan jer sol kúıi saqtalyp, saýda qatary bir metr keıin yǵystyryldy. Bazar ishindegi jol sol ádispen keńeıdi. Eshkim de ornyn joǵaltpady, jumyssyz qalǵan adam joq»,- dedi Rano Ábdirazaqova.
