Aqtóbede joldy kesip ótpek bolǵan stýdentti kólik qaǵyp, kóz jumdy

AQTÓBE. KAZINFORM – Oqıǵa búgin Aqtóbe qalasyndaǵy aǵaıyndy Jubanovtar kóshesinde boldy. 17 jastaǵy jigit joldy belgilenbegen jerden kesip ótken.

Aqtóbe oblystyq PD baspasóz qyzmetiniń habarlaýynsha, BMW avtokóliginiń júrgizýshisi joldy belgilenbegen jerden kesip ótken jaıaý júrginshini qaǵyp ketken. Jol-kólik oqıǵasynyń saldarynan 17 jastaǵy jaıaý júrginshi oqıǵa ornynda kóz jumdy. 

— Atalǵan fakti boıynsha tekserý júrgizilip jatyr. Oqıǵanyń barlyq mán-jaılary anyqtalady. Qajetti saraptamalar taǵaıyndaldy. Júrgizýshi eshqaıda qashqan joq, oqıǵa ornynda boldy, — dedi Aqtóbe oblystyq PD baspasóz qyzmeti.

Eske salsaq, Aqtóbede ákesiniń kóligin aıdap ketken jasóspirim jol apaty kezinde kóz jumdy. Oqıǵa Aqtóbe qalasy Baýyrlastar turǵyn alabynda boldy. 13 jastaǵy jasóspirim aýrýhanaǵa jetkizilgenimen, ómirin aman alyp qalý múmkin bolmady.