Aqtóbede joldardy qardan tazartýǵa 800 mıllıon teńgeden astam qarjy jumsaldy
QR Sybaılas jemqorlyqqa qarsy is-qımyl agenttigi «Sapaly jol» jobasyn qolǵa aldy. Óńirde «Aqtóbe – adaldyq alańy» jobalyq keńsesiniń músheleri qalalyq turǵyn úı – kommýnaldyq sharýashylyq bóliminiń ókilderimen birge monıtorıng júrgizdi.
«Monıtorıng jumysy barysynda arnaıy top qaladaǵy O.Koshevoı, T.Rysqulov, Jeńis dańǵyly, Grıshına, Ábilqaıyr han dańǵyly jáne Mareseva kósheleriniń qardan tazalaý jumystarynyń sapasyn baqylady. Kóshelerde jol jıegindegi qar alynbaǵan. Qalada 8 merdiger mekeme bar, onda 160 adam jumys istep júr. Jumysshy sany az, merdigerler úlgermeı jatyr. Eger qar tazartylmasa, kóktemde kósheni sý basady. Bul jumystarǵa bıyl bıýdjetten 819 mıllıon teńge bólingen eken», - dedi «Aqtóbe – adaldyq alańy» jobalyq keńsesiniń jetekshisi Janbolat Tortaev.
«Aqtóbe – adaldyq alańy» jobalyq keńsesi monıtorıng jumystaryn jalǵastyrady.
«Qala men aýmaqtaǵy 5 eldi mekendi kútip ustaý jumysy júrip jatyr. Bári kúndiz-túni jumys istep, qar jaýǵan kúni ákimdik qyzmetkerleri kezekshilikke turady. Birinshi kezekte avtobýs júretin, áleýmettik nysandar ornalasqan kósheler tazartylady. Keıde traktorlar kólik júretin joldy tazartyp, adam júretin jerge qar úıip tastaıdy. Jeke turǵyn úıler ózderi polıgonǵa tasýǵa mindetti. Biraq aýlasynan shyǵaryp, úıip qoısa eshkim shara qoldana almaıdy», - dedi basshysynyń orynbasary Danııar Aımaǵambetov.