Aqtóbede joldardy qysta kútip ustaýǵa 2,7 mlrd teńge jumsalady
AQTÓBE. KAZINFORM – 1 jeltoqsannan bastap tótenshe jaǵdaılar qyzmeti men polıtsııa birge kezekshilikke shyǵady. Bul jol qozǵalysyn shekteý men ýaqytsha jabýdy shuǵyl uıymdastyrýǵa múmkindik beredi.
Aqtóbe oblysynda jergilikti mańyzy bar joldardy qysta kútip ustaý úshin aýmaq 174 ýchaskege bólindi. Onyń 13-i oblystyq, qalǵany aýdandyq jol.
- Avtojoldardy kútip ustaýǵa 44 kompanııa jaýapty. Onyń ishinde 8-i oblystyq joldarda jáne 36-y aýdandyq joldarda jumys isteıdi. Kompanııalardyń 290 tehnıkasy daıyn. Barlyǵy 3,7 myń tonna ınertti materıal ázirlendi. Onyń ishinde qum-tuz qospasy, qum bar. Sonymen birge 1,8 myń tonna dızel otyny jetkizildi. Jalpy 2025 jylǵa jergilikti joldardy kútip ustaýǵa 2,7 mlrd teńge qarastyrylǵan. Onyń ishinde 1,2 mlrd teńge oblystyq joldarǵa, 1,5 mlrd teńge aýdandyq joldarǵa bólindi, - dedi Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyr.
Qazirgi kezde jol boıynda tıisti jol belgileri ornatylyp, sý ótkizgish qubyrlar men kópirler tazartylǵan. Aqtóbe oblystyq jolaýshylar kóligi jáne avtomobıl joldary basqarmasy men Ákimshilik polıtsııa basqarmasynyń qyzmetkerleri aldaǵy on kún boıy merdiger mekemelerdiń qysqy kezeńge daıyndyǵyn tekseredi.
- Oblystyq mańyzy bar avtomobıl joldaryndaǵy qar kóp jınalatyn ýchaskelerdiń jalpy uzyndyǵy - 98 shaqyrym. 1-jeltoqsannan bastap oblystyq mańyzy bar avtomobıl joldarynyń qar eń kóp jınalatyn ýchaskelerinde jalpy uzyndyǵy 5 000 metr jasandy qar ustaıtyn qurylǵy ornatylady. Ol Dóń-Badamsha-Aqtóbe-Orsk, Qobda - Mártók, Aqtóbe-Rodnıkovka-Mártók, Aqtóbe-Bolgarka-Shubarqudyq joldary. Qysta jedel áreket etý jáne biryńǵaı monıtorıng júıesine ıntegratsııalaý maqsatynda oblys ákimdigi janyndaǵy sıtýatsııalyq ortalyq 53 arnaıy tehnıkaǵa GPS navıgator ornatady. Sóıtip tehnıkanyń naqty ornalasqan jerin jáne qozǵalys baǵytyn baqylaýǵa múmkindik bar. 1 jeltoqsanynan bastap jol-kólik qozǵalysyn shekteý nemese ýaqytsha jabý sharalaryn qabyldaý úshin jol polıtsııasy basqarmasy jáne tótenshe jaǵdaılar departamenti birge kezekshilik uıymdastyrady,- dedi Aıbek Qaıyr.
Aıta keteıik, bıyl qysta respýblıkalyq joldarǵa 33,8 myń tonna qum, 7,6 myń tonna tuz daıyndalady. Sonymen birge qar basý qaýpi joǵary jol bólikterine aǵashtan qalqan jasalady.