Aqtóbede joldardy qysta kútip ustaýǵa 2,5 mlrd teńge jumsalady
AQTÓBE. KAZINFORM - Jergilikti mańyzy bar jolǵa 381 arnaıy tehnıka, 4,4 myń tonnadan astam ınertti materıal daıyndaldy. Sonymen birge oblystyq, respýblıkalyq mańyzy bar joldarda ázirlik júrip jatyr.
Aqtóbede joldardy qysqy mezgilge daıyndaý máselesi qaraldy. Qalada 357 arnaıy tehnıka daıyndalǵan. Jol 18 ýchaskege bólinip, merdiger uıymdar bekitildi.
- Qys bastalǵanǵa deıin 1 650 tonna tuz jáne 1 410 tonna qum-tuz qospasyn daıyndaý josparlanǵan. Shalǵaıdaǵy turǵyn alaptarda joldardy jedel tazalaý úshin tehnıka men kóktaıǵaqqa qarsy materıaldar saqtalatyn jol-paıdalaný pýnkteri ashylady,- dep habarlady Aqtóbe oblysy ákiminiń baspasóz qyzmeti.
Oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyrdyń málimetinshe, jergilikti mańyzy bar joldardaǵy 174 ýchaskede 55 merdiger uıym qyzmet kórsetedi. Qysqy maýsymǵa 381 arnaıy tehnıka daıyndalyp, 4,4 myń tonna kóktaıǵaqqa qarsy materıal jáne 12,6 myń tonna dızel otyny ázirlengen. Jalpy 2026 jyly oblystyq jáne aýdandyq joldardy kútip-ustaýǵa 2,5 mlrd teńge qarastyrylǵan. Jol qaýipsizdigin arttyrý maqsatynda 5 myń metr qar toqtatatyn qurylǵy ornatý jáne 53 birlik arnaıy tehnıkaǵa GPS-monıtorıng júıesin engizý josparlandy.
Al «QazAvtoJol» UK» AQ oblystyq fılıalynyń dırektory Aıbol Danaǵuldyń aıtýynsha, respýblıkalyq «Samara – Shymkent» tasjolynyń 763-1025 shaqyrylymy aralyǵynda 59 arnaıy tehnıka bekitilgen. Qar men kóktaıǵaqqa qarsy jumysqa 9,4 myń tonna usaqtalǵan tas, 2,9 myń tonna tuz jáne 16 myń tonna qum jınalady.
- Jol qyzmetteriniń arnaıy tehnıkaǵa degen normatıvtik qajettiligi ázirge tolyq qamtamasyz etilmegen. Qajetti 154-tiń ornyna qazirgi ýaqytta 127 tehnıka bar. Jaqyn arada taǵy 13 tehnıka, onyń ishinde tórt avtogreıder men toǵyz júk tıegish jetkiziledi dep kútilýde. Respýblıkalyq mańyzy bar avtomobıl joldarynyń boıynda jalpy uzyndyǵy 246 shaqyrymdy quraıtyn qar basý qaýpi bar 101 ýchaske anyqtalǵan. Joldardy qorǵaý maqsatynda 28 ýchaskede temirbeton qorshaý ornatylǵan, qalǵan bólikterde qardan qorǵaıtyn qalqan ornatý jumystary jalǵasyp jatyr,- dep habarlady Aqtóbe oblysy ákiminiń baspasóz qyzmeti.
Buǵan deıin habarlaǵanymyzdaı, elordalyq jýrnalıster «QazAvtoJol» ulttyq kompanııasynyń uıymdastyrýymen ótken baspasóz týryna qatysyp, jol qyzmetiniń qysqa daıyndyǵyn kórdi.
