Aqtóbede joldar jabyq, júkti kelinshek úıinde bosandy
AQTÓBE. QazAqparat – Dárigerler boranǵa baılanysty perzenthanaǵa jetkize almaǵan Nıkeltaý aýylynyń turǵynyn úıinde bosandyryp aldy, dep habarlaıdy QazAqparat tilshisi.
Aqtóbede boran saldaryna birneshe jol jabylyp, arnaıy qyzmet úzdiksiz jumysqa kóshti. Oblystyq, respýblıkalyq mańyzy bar joldardy tazartýǵa 200-den astam tehnıka jumyldyryldy. Aqtóbe oblystyq TJD-niń jeke quramynan 280 qyzmetker jáne 83 arnaıy tehnıka qutqarý jáne kómek kórsetý úshin daıyndaldy. Ótken táýlikte Aqtóbe oblysynyń aýmaǵynda 2 shaqyrý tústi.
«Baıǵanın aýdanynda aýyl turǵyny mal izdep ketip, habar-osharsyz qalǵan. Іzdestirý jumystarynyń nátıjesinde Jyńǵyldy toǵaı aýylynan 20 shaqyrym qashyqtyqta ákesi men balasy tabyldy. Turǵyndardy izdestirý jumystary kezinde qutqarýshylar tas jolda Aqtaý qalasynyń turǵynyna da kómektesti. Ony jaqyn mańdaǵy kempıngke deıin jetkizdi. Aqtaýlyq azamattyń kóligi buzylyp qalǵan. Sonymen birge Nıkeltaý aýylynda turatyn júkti áıeldi Hromtaý aýdanynyń aýrýhanasyna jetkizý qajet boldy. Habarlama túsken boıda , oblystyq TJD-nen 4 adam jáne tehnıka jiberildi. Qutqarýshylar men dárigerler shaqyrý ornyna jetip, júkti áıeldi úı jaǵdaıynda bosandyryp aldy. Qazir anasy men qyzynyń jaǵdaıy jaqsy. Olardy Hromtaý aýdandyq ortalyq aýrýhanasyna tasymaldaý jumysy júrgizilip jatyr», - dedi oblystyq TJD baspasóz qyzmeti.
