Aqtóbede jolda qalǵan jedel járdem men avtobýs jolaýshylaryna kómek kórsetildi
AQTÓBE. KAZINFORM – Avtobýs Reseıden Tashkentke qaraı baǵyt alǵan. Al jedel járdem Muǵaljar aýdany Aşysaı aýylynan shyqqanymen, júre almaı ana men balasyn qutqarýshylar tasymaldady.
Aqtóbe oblysynda aıaz kúsheıip, polıtsııa men tótenshe jaǵdaılar qyzmeti joldarda qutqarý jumysyn júrgizdi. Samara – Shymkent tasjolynda Reseıden Shymkent qalasyna baǵyt alǵan avtobýstyń jolaýshylaryna kómek kórsetti. Qatty aıaz ben boran saldarynan avtobýstaǵy dızel otyny qatyp, júre almady.
– Polıtsııa qyzmetkerleri jolaýshylardyń qaýipsizdigin qamtamasyz etti. Tótenshe jaǵdaılar qyzmetiniń qyzmetkerlerimen birlesip, jolaýshylar Yrǵyz aýdanynyń Qalybaı aýyly mańyndaǵy kempıngke jetkizilip, ýaqytsha ornalastyrdy. Avtobýs salonynda 11 jolaýshy jáne eki júrgizýshi boldy. Olar medıtsınalyq kómekti qajet etpedi, - dep habarlady Aqtóbe oblystyq PD baspasóz qyzmeti.
Sondaı-aq qutqarýshylar ana men balany aýrýhanaǵa jetkizdi.
– TJD qyzmetkerleri Muǵaljar aýdanynyń Aşysaı aýylynda avarııalyq-qutqarý jumystaryn júrgizdi. Boran men aıaz kúsheıip, Aşysaı aýylynan shyqqan jedel járdem kóligi júre almady. Qutqarýshylar joǵary ótimdi tehnıkanyń kómegimen áıel men onyń 2024 jyly týǵan ulyn Qandyaǵash qalasyndaǵy aýrýhanaǵa jetkizdi, - dep habarlady oblystyq TJD baspasóz qyzmeti.
Aıta keteıik, boran men aıaz saldarynan elimizdiń birneshe oblysynda joldar ýaqytsha jabyq tur. Olardyń arasynda Aqtóbe de bar.