Aqtóbede jolda qalǵan Tájikstan azamattary qutqaryldy
AQTÓBE. QazAqparat – «Samara–Shymkent» tasjolynda kóligi buzylyp, qar qursaýynda qalǵan jolaýshylar qutqaryldy, dep habarlaıdy QazAqparat tilshisi.
18 aqpan kúni oblystyq tótenshe jaǵdaılar qyzmetine Aqtóbeniń Hromtaý qalasynan 20 shaqyrym jerde «Skoda octavia» jáne «Lada Largus» avtokólikteri qar qursaýynda qalǵany týraly aqparat tústi. Órt sóndirý jáne avarııalyq-qutqarý jumystary qyzmetinen 4 adam, 1 avtokólik oqıǵa ornyna jiberildi.
«9 Tájikstan azamaty qutqarylyp, «Sherhan» kempıngine jetkizildi. Sonymen qatar, 19 aqpan kúni tańda «Samara-Shymkent» tasjolynyń Yrǵyz aýdany mańynda «Honda Illusion» kóligi buzylyp, jolda qalǵany týraly aqparat tústi. Munda da 7 Tájikstan azamaty qutqarylyp, «Tulpar» kempıngine jetkizildi», - dep habarlady oblystyq TJD baspasóz qyzmeti.
