Aqtóbede jolda qalǵan sheteldikter jylytý pýnktine jetkizildi

AQTÓBE. KAZINFORM — Máskeýden Tájikstanǵa baǵyt alǵan avtobýs buzylyp, 57 adamdy jylytý pýnktine jetkizildi. Sonymen birge Tashkentten Máskeýge baǵyt alǵan ózbekstandyqtar mektepke ornalastyryldy. 

Aqtóbe oblysynda boran, aıaz saldarynan kólikter jolda qalyp jatyr. Áıteke bı aýdany aýmaǵynda avtobýs buzylyp qalǵan. Máskeý qalasynan Tájikstanǵa baǵyt alǵan avtobýsta 57 adam, onyń ishinde 3 bala boldy. Olarǵa tótenshe jaǵdaılar qyzmetiniń qutqarýshylary kómektesti. Bári de Tájikstan Respýblıkasynyń azamattary. Jolaýshylar Qarabutaq aýylyndaǵy meshitte ornalasqan jylytý pýnktine jetkizildi. Eshkim dáriger kómegine júginbedi.

— Aqtóbe oblysynyń Qarǵaly aýdanynda da avarııalyq-qutqarý jumystary júrgizildi. Qar qursaýynda qalǵan eki avtokólikten Tashkent qalasynan Máskeý qalasyna jol tartqan Ózbekstan Respýblıkasynyń 11 azamaty qutqaryldy. Avtokólikter qardan shyǵarylyp, Josaly aýylyna jetkizildi. Jolaýshylar Josaly aýylyndaǵy orta mektep bazasynda uıymdastyrylǵan jylytý pýnktine ornalastyryldy, — dep habarlady Aqtóbe oblystyq TJD baspasóz qyzmeti.

Eske salsaq, BQO-da boranda joǵalyp ketken úsh adamnyń denesi tabyldy. Jánibek aýdany Kúıgenkól aýyldyq okrýginiń ortalyǵy Jasqaırat aýyly mańynda 57 jastaǵy er adamnyń denesi tabyldy. Sondaı-aq Bókeı ordasy aýdanynda 25 jastaǵy, Kaztalovta 35-tegi er adamnyń qaza tapqany belgili boldy. Ekeýi de úsip ketken.