Aqtóbede jolda qalǵan avtobýs jolaýshylary qutqaryldy
AQTÓBE. QazAqparat – Reseıden Túrkistanǵa baǵyt alǵan avtobýs jolda toqtap qaldy. Jolaýshylardy polıtsııa, tótenshe jaǵdaılar qyzmeti men jol tazalaýshylar jylytý beketine jetkizdi, dep habarlaıdy QazAqparat tilshisi.
Respýblıkalyq mańyzy bar Samara-Shymkent tasjolynda baqylaý júrgizgen polıtsııa qyzmetkerleri toqtap turǵan avtobýsty baıqaǵan.Tekserý barysynda avtobýstyń Reseıdiń Samara qalasynan Túrkistan oblysynyń Saryaǵash qalasyna bet alǵany anyqtaldy. Salonda 55 jolaýshysy bar avtobýstyń jolda jylytý júıesi qatyp qalǵan. Patrýldik polıtsııa jasaǵy, tótenshe jaǵdaılar departamentiniń qyzmetkerleri men «Qazavtojol» mekemesiniń mamandarymen birlesip, jolda qalǵan azamattardy evakýatsııalady.
«Avtobýstaǵy 55 jolaýshyny Hromtaý aýdanyna qarasty Bógetsaı aýylynyń aýyldyq klýbyna jetkizdi. Olarǵa ystyq shaı berip, tamaqtandyryp, ornalastyrdy. Tártip saqshylary men TJD qyzmetkerleri avtobýstyń aqaýyn jóndep, jolaýshylarǵa der kezinde kómek kórsetip jatyr. Aýa raıynyń kúrt buzylýyna baılanysty Aqtóbe oblysy polıtsııa departamenti, TJD jáne jol qyzmetkerleri ózara jedel aqparat almasyp, keptelisterdi joıý, tótenshe jaǵdaılardyń aldyn alý sharasyn júrgizip jatyr. Ortaq aqparattyq baılanys ornady», - dedi oblystyq PD baspasóz qyzmetiniń jetekshisi Erbolat Sarqulov.
