Aqtóbede jolaýshyny urǵan avtobýs júrgizýshisine qatysty qylmystyq is qozǵaldy
AQTÓBE. QazAqparat - Aqtóbe qalasynda №24 baǵyttaǵy avtobýs júrgizýshisi jolaýshyny uryp tastady. Osy oqıǵaǵa baılanysty oblystyq ІІD qylmystyq is qozǵalǵanyn málimdedi, dep habarlaıdy QazAqparat tilshisi.
Aqtóbe qalasyndaǵy jolaýshylar tasymalymen aınalysatyn «Avtopark» JShS júrgizýshisi jolaýshyny uryp tastady. Oqıǵany sol avtobýs ishinde bolǵan jolaýshynyń biri uıaly telefonyna túsirip, keıin áleýmettik jelige jarııalap jibergen. Qala turǵyndarynyń narazylyǵyn týǵyzǵan oqıǵadan soń oblystyq ІІD júrgizýshiniń ustalǵanyn, qylmystyq is qozǵalǵanyn aıtty.
«Qylmystyq kodekstiń «Buzaqylyq» baby boıynsha sot aldy tergeý jumystary júrip jatyr. Júrgizýshiniń kim ekeni anyqtalyp, Sazdy polıtsııa bólimine jetkizildi»,- dep habarlady oblystyq ІІD baspasóz qyzmeti.
Aıta keteıik, áleýmettik jeli qoldanýshylarynyń biri sol avtobýs ishinde bolǵanyn, qoǵamdyq kóliktiń aıaldamalarǵa toqtaý ýaqyty azaıyp, kondýktor adamdardyń tez túsip, minýin talap etkenin jáne jolaýshy óz aıaldamasynda túsip úlgermegeni úshin soqqyǵa jyǵylǵanyn aıtty. Al «Avtopark» JShS bul oqıǵaǵa qatysty qandaı da bir aqparat berýden bas tartty.
