Aqtóbede jolaqy qymbattasa kimderge jeńildik jasalady
AQTÓBE. QazAqparat - Aqtóbe qalasynda jolaqy men qoqys tarıfin kóterý máselesin máslıhat depýtattary talqylap, zeınetkerler men stýdentterge jeńildik surady, dep habarlaıdy QazAqparat tilshisi.
Aıta ketsek, Aqtóbe qalasyndaǵy «Avtopark» JShS-i men Qalalyq jolaýshylar tasymaly kásiporny jańa avtobýstar satyp alyp, keıin jolaqyny kóterýdi surap, barlyǵy 6 qoǵamdyq tyńdaý ótken bolatyn. Al búgin qalalyq máslıhat depýtattary men qoǵam belsendileri buǵan qatysty óz usynystaryn aıtty.
«Halyqpen kezdesip, sóılesken kezde olar qarsy boldy. Biraq bizdiń esebimiz daıyn. Eger tarıf kóterilse júrgizýshiniń jalaqysy kóbeıip, qyzmet kórsetý sapasy jaqsarady»,- dedi Aqtóbe qalalyq jolaýshylar tasymaly kásipornynyń dırektory Rústem Erǵalıev.
Jıyn kezinde Aqtóbe qalalyq jolaýshylar tasymaly jáne avtomobıl joldary bóliminiń basshysy Rýslan Tóreǵalı jeńildikter retin túsindirip berdi.
«Atyraý, Oral, Semeı, Qostanaı, Kókshetaý qalalarynda jol quny 80 teńge, Shymkentte 70, Óskemende 75, Qyzylordada 90 teńge bolyp otyr. Tasymaldaýshylar jańa tarıfke ótinish berdi. «Avtopark» JShS-i shyǵyndy eseptep, 212 teńge dep belgiledi. Al Jolaýshylar tasymaly kásiporyny 185 teńge dep usyndy. Jeńildikter retinde UOS qatysýshylar, UOS qatysýshylaryna teńestirilgender men 1 top múgedekterine, 12 jasqa deıingi múgedek balalarǵa tegin júrý quqyǵyn berýge kelisip otyr. Jasyna baılanysty zeınetke shyqqan adamdarǵa, aýǵan soǵysyna qatysqandar men 2,3 top múgedekterine 60 teńge usynyldy»,- dedi Aqtóbe qalalyq jolaýshylar tasymaly jáne avtomobıl joldary bóliminiń basshysy Rýslan Tóreǵalı.
Jıyn kezinde máslıhat depýtaty Muratbaı Ájibaev zeınetkerlerge 55 teńge kúıinde qaldyryp, stýdentterge jeńildik qarastyrýdy usyndy. Sonymen qatar, jıyn kezinde Chernobyl men Aýǵan soǵysyna qatysýshylarǵa tegin júrý quqyǵyn berý týraly aıtyldy. Kelesi aptada depýtattar naqty sheshim qabyldaıdy.
