Aqtóbede jolaqy qymbattady
AQTÓBE. QazAqparat - Aqtóbe qalasynda jolaqy 55 teńgeden 80 teńgege qymbattady, dep habarlaıdy QazAqparat tilshisi.
Aqtóbe qalasynda jolaýshylar tasymalymen aınalysatyn «Avtopark» JShS-i men Qalalyq jolaýshylar tasymaly kásiporny buǵan deıin jolaqyny 55 teńge kúıinde saqtap otyrdy. Al erteńnen bastap qaladaǵy jolaqy 80 teńge bolady.
«Qalalyq máslıhat depýtattary «jolaqy quny 80 teńge bolady» degen sheshimdi osy jyldyń 28-tamyzy kúni qabyldady. Bir aıdan soń depýtattardyń kelisimi negizinde qalalyq ákimdik sheshim shyǵardy. Biz resmı buqaralyq aqparat quraldaryna habarlama shyǵýyn kúttik. 17-qazan kúni habarlama shyqty. Zańǵa sáıkes erteńnen bastap jolaqy 80 teńge bolady. Talap boıynsha tasymaldaýshy kompanııa jyl sońyna deıin elektrondy bıletke arnalǵan apparatty qondyrýy kerek. Sonymen qatar, jańa avtobýstar satyp alynady», - dedi «Avtopark» JShS-niń zańgeri Rýslan Jylqamanov.
Buǵan deıin habarlaǵanymyzdaı, jasy 7-ge tolmaǵan balalar, UOS ardagerleri, ardagerlerge teńestirilgen adamdar men zaǵıp І, ІІ top múgedekteri, múgedek balalar qoǵamdyq kólikte tegin júre alady. Al 7-15 jastaǵy balalar 40 teńge, jasyna baılanysty zeınetke shyqqandar men Chernobyl apatyn zalalsyzdandyrǵan adamdar jáne ІІ, ІІІ top múgedekteri 60 teńge tóleıdi.
Eske salsaq, qoǵamdyq tyńdaý kezinde aqtóbelik tasymaldaýshylar 55 teńgelik jolaqyny birden 200-212 teńgege kóterýdi surady.
