Aqtóbede jol jóndeýshiler sırek kezdesetin aǵashtardy kesip tastady
AQTÓBE. QazAqparat – Aqtóbe polıtsııasy aǵashtardy zańsyz keskenderdi anyqtady. Qurylysshylar keltirgen shyǵyn 700 myń teńgeden asty, dep habarlaıdy QazAqparat tilshisi.
«Taza Qazaqstan» jedel aldyn alý sharasy kezinde ekologııalyq zańnamany buzý jáne qorshaǵan ortaǵa zııan keltirýdiń 1 myńnan astam faktisi anyqtalǵan.
«Sırek kezdesetin jáne joıylyp ketý qaýpi bar ósimdikter men olardyń bólikterin zańsyz paıdalaný faktisi tirkeldi. Kishi Qobda ózeniniń janynda tasjol tósep jatqan seriktestik sırek kezdesetin aǵashty kesip tastady. 43 túp jabysqaq qandyaǵash joıylǵan. Shyǵyn 716 myń teńgeni qurady, kúdikti ustaldy», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, jedel aldyn alý sharasyna 70-ten astam adam, onyń ishinde 56 polıtsııa qyzmetkeri, TJD 15 qyzmetkeri jáne Aqtóbe oblystyq aýmaqtyq ınspektsııasynan 3 ınspektor jumyldyryldy.
