Aqtóbede jol jóndeýge 5,3 mlrd teńge bólindi
AQTÓBE. QazAqparat – Aqtóbe oblysy boıynsha jol jóndeýge 5,3 mıllıard teńge bólindi, dep habarlaıdy QazAqparat tilshisi.
Aqtóbe oblysynyń ákimi Ońdasyn Orazalın qaladaǵy jóndeýdi talap etetin Ábilhaıyr han, Áz-Naýryz, Bókenbaı batyr, Sáńkibaı batyr syndy birneshe kóshelerdi aralady.
«Aqtóbedegi jol problemasy bir kúnde bolǵan dúnıe emes. Ótken jyly qarajattyń qaralmaýy, eki-úsh jyl burynǵy merdiger mekeme jumystarynyń salǵyrttyǵynan joldardyń jaǵdaıy osyndaı kúıge túsip otyr»,- dedi oblys ákimi Ońdasyn Orazalın.
2020 jyly oblystyq, qalalyq, respýblıkalyq bıýdjetterden qala joldaryn jóndeýge 5,3 mlrd teńge bólingen. Sonymen qatar quny 11,8 mlrd teńge bolatyn avtomobıl joldaryn jóndeý úshin 40 jobalyq-smetalyq qujat ázirlendi. Osy jobalardy tolyq iske asqanda asfalt jamylǵysymen qamtylǵan avtomobıl joldarynyń kórsetkishi 80% deıin jetedi. Qazirgi kezde aryz-shaǵym kúrt kóbeıip, «Erhat joldary», «Avtolaın», «Barlyq qurylys» merdiger mekemeleri óz qarjysyna jáne demeýshilik jasap, oı-shuqyrlardy biteý jumystaryn bastady.
«Kópshiliktiń, ásirese kólik júrgizýshilerdiń janaıqaıyn túsinip otyrmyn. Degenmen, ashýǵa berilip, emotsııaǵa salynǵanda eshnárse sheshilmeıtinin túsinýimiz kerek. Qalaǵa janashyr azamattar isti qolǵa aldy. Bolashaqta sapaly joldarǵa qol jetkizemiz degen senimdemin», - dedi Ońdasyn Orazalın.
Óńir basshysy qala ákimi Mavr Abdýllınge memlekettik satyp alý konkýrsyna qatysatyn merdiger kompanııalarǵa talapty kúsheıtýdi tapsyrdy.
