Aqtóbede jol jóndeý jumystary qarqyn ala bastady
Atap aıtqanda, «Aqtóbe-Qandyaǵash» avtokólik jolyn qalpyna keltirý jumystary bastaldy. Qazir jumys joldyń 11-52 shaqyrymy aralyǵynda jáne 52-shaqyrymnan Qandyaǵash qalasyna deıingi eki ýchaskede júrgizilip jatyr.
«Búginde alǵashqy úsh shaqyrymdaǵy jumys aıaqtaldy. Biz qazirdiń ózinde 19 shaqyrymǵa deıin asfalt tóseýdi bastadyq jáne kelesi aptanyń sońyna deıin aıaqtaýdy josparlap otyrmyz», - deıdi «QazAvtoJol» UK» AQ Aqtóbe fılıalynyń basshysy Marat Mahambetov.
Joba aýqymdy. Joldy tórt jolaqqa deıin keńeıtý josparlanyp otyr. Kópirler, mal ótetin jer men temir jol ótkelderin salý qarastyrylǵan. Mamandardyń aıtýynsha, bıyl joǵary sapaly jol tósemi avtokólik júrgizýshilerine qoljetimdi bolady.
Aqtóbe-Atyraý tas jolynyń Aqtóbe qalasynan Bestamaq aýylyna deıingi aralyqtaǵy eki jolaq tamyzdyń ortasyna deıin aıaqtalyp, kúzde Qandyaǵashqa deıingi jolaq ashylýy tıis.
Sonymen birge, Aqtóbe qalasynyń Ońtústik aınalma jolyn qalpyna keltirý jumystary qarqyndy júrgizilip jatyr. Jumys barysymen tanysqan óńir basshysy birqatar tapsyrma berdi.
«Jol máselesi turǵyndardyń narazylyǵyn týdyryp otyr. Ótken jyly merdiger jaýapkershiliginiń tómendiginen jumys toqtap qalsa, bıyl jaýyn-shashynnan keıin jumys qaıta jandanyp, joǵary qarqynmen júrip jatyr. Eń aldymen, osy aıdyń sońyna deıin ıAsnoe aýylynyń mańyndaǵy jol qurylysy aıaqtalyp, kólik qozǵalysy qalpyna kelýi tıis. Kúzge qaraı asfalt tóseý jumystary tolyǵymen aıaqtalýy kerek. Bul jerde qarjyǵa baılanysty suraqtar joq. Jumys kestesiniń saqtalýyn turaqty baqylap otyrýdy qamtamasyz etińiz», - dedi oblys ákimi Ońdasyn Orazalın jolaýshylar kóligi jáne avtomobıl joldary basqarmasynyń basshysy Aıbek Qaıyrǵa.
Taǵy bir mańyzdy joba – batys aınalma jolynyń qurylysy. Uzyndyǵy 8,3 shaqyrym bolatyn jol Samara-Shymkent jáne Aqtóbe-Mártók-RF shekarasy tas jolyn qosady. Aýyr júk kólikteriniń qalaǵa kirmeýine jáne tikeleı ónerkásip aımaǵyna ótýine múmkindik beredi. Jobany kelesi jyly aıaqtaý josparlanǵan.
Qalanyń keńeıýine baılanysty Aqtóbede Táýelsizdik dańǵylyn 8 jolaqqa deıin keńeıtý jumystary bastaldy. Sondaı-aq, M. Shoqaı kóshesi 6 jolaqqa deıin keńeıtiledi. Shilde aıynyń sońyna deıin Á. Moldaǵulova dańǵylynan M. Shoqaı kóshesine deıingi ýchaskede qozǵalys ashylady dep josparlanǵan. Osydan keıin M. Shoqaı kóshesi qalpyna keltiriledi. Bul kóshe oblys ákiminiń tapsyrmasyna sáıkes oqý jyly bastalǵanǵa deıin ashylýy tıis. Joba boıynsha Táýelsizdik dańǵylyn qalpyna keltirý jumystary kelesi jyly tolyq aıaqtalady.
