Aqtóbede jol jóndeý jumystaryna bıyl 70 mlrd teńgeden astam qarjy jumsalady
AQTÓBE. KAZINFORM – Barlyǵy 518 shaqyrym jol jóndeledi. Onyń kóbi respýblıkalyq baǵytta.
Aqtóbe oblystyq avtomobıl joldary jáne jolaýshylar kóligi basqarmasynyń basshysy Aıbek Qaıyrdyń aıtýynsha, 2026 jyly óńirde 518,2 shaqyrym jol jóndeledi. Onyń 227,5 shaqyrymy respýblıkalyq, 218,2 shaqyrymy jergilikti, 72,5 shaqyrymy qala jáne aýdan joly. Bul jumystarǵa 73,4 mlrd teńge qarastyryldy.
- Jol qurylysy men jóndeýdi ýaqytyly bastaý úshin qazir qajetti materıaldar daıyndalyp jatyr. Eń bastysy – bıtým. Oblysqa 30-40 myń tonnasy qajet bolsa, onyń 16 myń tonnasy bar,- dedi Aqtóbe oblystyq avtomobıl joldary jáne jolaýshylar kóligi basqarmasynyń basshysy Aıbek Qaıyr.
Kúrdeli jóndeý Aqtóbe qalasyndaǵy Ǵ.Jubanova kóshesinde, Shalqar-Bozoı baǵytynyń 95-115 shaqyrymy, Aqtóbe-Orsk-Petropavlovka-Haziret baǵytynyń 0-7 shaqyrymy aralyǵynda júrgiziledi. Sonymen birge Shubarqudyq-Oıyl-Qobda-Sol-Iletsk, Pokrovka-Temir-Keńqııaq-Embi, Dóń-Badamsha-Aqtóbe-Orsk joldarynyń birneshe bóligine ortasha jóndeý júrgiziledi. Bul jumystarǵa qarjy bıýdjetten qarastyrylǵan ári bári de oblystyq mańyzy bar jol.
Aqtóbe qalasy boıynsha Astana turǵyn alabynyń jobasyna ózgertý engizilip, Baýyrlastar-1,2, Aqjar-2, Órleý turǵyn alaptaryna jol salynady. Qala irgesindegi Shılisaı aýylynyń negizgi kóshesi asfalttalady. Sonymen birge ondaǵan kóshege ortasha jóndeý jumysy júrgiziledi.
Aıta keteıik, Aqtóbede týrıstik nysandarǵa aparar joldar da salynyp jatyr. Bıyl Qarǵalydaǵy Qasqyr sarqyramasyna, Qobda aýdanynyń Abat Baıtaq kesenesine aparar joldyń jóndeý jumystary aıaqtalady.
Buǵan deıin Aqtóbede jóndeletin respýblıkalyq mańyzy bar joldar týraly jazyldy.
