Aqtóbede jol salynbaı turyp, qarjy bólgen sheneýnikterge qylmystyq is qozǵaldy

AQTÓBE. QazAqparat - Aqtóbeniń Shalqar qalasyndaǵy tórt kósheni jóndeý kezinde sheneýnikter qatelik jibergen. Osy derekke qatysty qylmystyq is qozǵaldy, dep habarlaıdy QazAqparat tilshisi.

Sybaılas jemqorlyqqa qarsy is-qımyl ulttyq bıýrosynyń oblystyq departamenti Shalqar aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi men Shalqar aýdany ákimdiginiń birneshe qyzmetkerine qatysty isti tergep jatyr. Qylmystyq kodekstiń «Senip tapsyrǵan bóten múlikti ıemdenip alý nemese talan-tarajǵa salý» babymen is qozǵaldy.

«2018 jyly Shalqar qalasynyń Tuńǵatarov, Boranbaıuly, Bostandyq jáne Qaraǵul kósheleriniń jolyn jóndemeı turyp, jumystardy qabyldap, memlekettiń 29 mıllıon teńgesin aýdaryp jibergen. Bul derekti oblystyq tekserý komıssııasy anyqtady. Qazir sot-ekonomıkalyq saraptama taǵaıyndaldy. Іske qatysty adamdardan jaýap alynyp jatyr», - dedi Aqtóbe oblystyq prokýratýrasy basqarmasynyń aǵa prokýrory Jánibek Tórebekov.