Aqtóbede jol-kólik apatynda anasy men balasy kóz jumdy

AQTÓBE. KAZINFROM — Aqtóbe-Atyraý tasjolynda jol-kólik oqıǵasy bolyp, jeńil jáne júk kóligi soqtyǵysty. Oqıǵa ornynda anasy men balasy kóz jumdy. 

Oqıǵa Aqtóbe-Atyraý tasjolynyń Temir aýdany aýmaǵynda boldy. Oblystyq PD baspasóz qyzmetiniń habarlaýynsha, jeńil kólik júrgizýshisi qarsy baǵytqa shyǵyp, júk kóligimen soqtyǵysady. Saldarynan 31 jastaǵy áıel men 3 jasar balasy kóz jumdy. Al júrgizýshi men 10 aılyq balasy aýrýhanaǵa jetkiziledi.

— Jol-kólik oqıǵasynan soń Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha is qozǵaldy. Qazirgi kezde tergeý júrip jatyr, — dedi oblystyq PD baspasóz qyzmetiniń jetekshisi Erbolat Sarqulov.

Jol-kólik apatynan aýrýhanaǵa túsken júrgizýshi úıine shyqty. Al bala qazir kópsalaly oblystyq balalar aýrýhanasynda em alyp jatyr.

— 10 aılyq qyz bala qazir aýrýhanada em alyp jatyr. Jaǵdaıy turaqty, — dedi oblystyq densaýlyq saqtaý basqarmasynyń baspasóz qyzmeti.

Aıta keteıik, buǵan deıin Aqtóbede úsh jasar bala besinshi qabattan qulap ketti.