Aqtóbede jol-kólik apatynan soń aýrýhanaǵa jetkizilgen taǵy bir adam kóz jumdy
AQTÓBE. KAZINFORM – Baıǵanın aýdanyna sanavıatsııa brıgadasy bardy. Aman qalǵan 7 adamdy dárigerler qarap jatyr.
Keshe Aqtóbe – Astrahan respýblıkalyq mańyzy bar avtojolynyń Baıǵanın aýdany Qaraýylkeldi aýyly mańynda iri jol-kólik apaty tirkeldi. DAF markaly júk kóligi Toyota Camry markaly eki jeńil avtokólikpen soqtyǵysyp, oqıǵa ornynda eki adam kóz jumdy. Aýrýhanaǵa jetken soń taǵy bir adam mert boldy.
– Oqıǵa ornyna aýdandyq aýrýhananyń jedel brıgadasy jetti. Jol apaty saldarynan 10 adam zardap shekti. Medıtsına qyzmetkerleri jetkenshe ekeýi kóz jumdy. Al 8 adam aýrýhanaǵa jetkizildi. Aýyr jaǵdaıda bolǵan bir patsıentti qutqarý múmkin bolmady. Zardap shekken qalǵan adamdar qajetti em alyp jatyr. Aqtóbeden sanavıatsııa brıgadasy keldi,- dedi Baıǵanın aýdandyq aýrýhanasy basshysynyń mindetin atqarýshy Dosbol Áýezov.
Aıta keteıik, Qostanaı oblysynda eki jeńil kólik soqtyǵysyp, saldarynan eki adam kóz jumdy.
