Aqtóbede jol-kólik apatyna kimniń kináli ekeni aıtyldy

AQTÓBE. KAZINFORM — Áıteke bı aýdany Belqopa aýyly mańynda DAF júk kóliginiń júrgizýshisi qarsy baǵytqa shyǵyp ketken. Qylmystyq is boıynsha tergeý júrip jatyr. 

Samara-Shymkent tasjolyndaǵy jol-kólik apatynan soń oqıǵa ornyna oblystyq PD bastyǵy Abaı Júsipov te bardy. Ol aldyn ala boljamdy aıtty.

— Júk kóligi qarsy baǵyttaǵy jol jolaǵyna shyqqan. Atalǵan fakti boıynsha sotqa deıingi tergeý bastaldy. Belgili bolǵandaı, «GAZel» kóligi Júrgenev atyndaǵy aýyldan oblys ortalyǵyna resmı túrde jolaýshylar tasymaldaýmen aınalysqan. Oqıǵa ornynda polıtsııa qyzmetkerleri, jedel-tergeý toby jáne TJD qyzmetkerleri jumys istep jatyr. Oqıǵanyń barlyq mán-jaıy anyqtalady, qajetti tergeý amaldary júrgizilip jatyr, — dedi oblystyq PD bastyǵy Abaı Júsipov.

Oblystyq PD baspasóz qyzmetiniń habarlaýynsha, jyl basynan beri Samara -Shymkent tas jolynda 89 jol oqıǵasy tirkeldi, 25 adam qaza tapty, 181 jaraqattandy. Al Aqtóbe — Qarabutaq arasynda 47 jol-kólik oqıǵasy bolyp, 13 adam qaza tapty, 111-i jaraqattandy.

Aıta ketelik Aqtóbede eki kólik soqtyǵysyp, 12 adam qaza tapqan edi.  Jol apatynan aman qalǵan úsh adamnyń jaǵdaıy aýyr, ekeýiniń jaǵdaıy ortasha. Sondaı-aq Aqtóbede jol-kólik oqıǵasynan soń Samara-Shymkent tasjolynyń bir bóligi jabyldy.  ІІM Aqtóbe oblysyndaǵy jol-kólik oqıǵasyn tergeý úshin arnaıy top jiberdi.