Aqtóbede jol-kólik apatyna baılanysty aıyptalǵan júrgizýshi aqtalyp shyqty
AQTÓBE. KAZINFORM — Sottalýshy Ramazan Infýrov sot zalynan bosatyldy. Sýdıa polıtsııa men prokýrorǵa jeke qaýly shyǵardy.
Jol-kólik oqıǵasy osydan úsh jyl buryn boldy. Jol apaty kezinde polıtsııa Mitsubishi Montero Sport avtokóliginiń júrgizýshisi Samara-Shymkent avtojolynyń 938-shaqyrymynda qarsy qozǵalysqa arnalǵan jolaqqa shyǵyp, qarsy baǵytta kele jatqan Volvo júk kóligimen soqtyǵysqanyn aıtty. Sol kezde júrgizýshi áıeldiń kúıeýi, úsh balasy kóz jumdy.
Keıin Áıteke bı aýdandyq sotynda Qylmystyq kodekstiń «Abaısyzda eki nemese odan da kóp adamnyń ólimine ákep soqqan jol qozǵalysy qaǵıdalaryn buzý» baby boıynsha is qaraldy. Sot jol qozǵalysy qaǵıdalaryn buzý faktisi óz dálelin tappady degen tujyrymǵa kelip, aqtaý úkimin shyǵardy.
Arada úsh jyl ótkende júk kóliginiń júrgizýshisine aıyp taǵyldy. Іs Aqtóbe oblystyq qylmystyq ister jónindegi mamandandyrylǵan aýdanaralyq sotynda Alqa bılerdiń qatysýymen ótti.
— Ramazan Infýrovtyń isi Qylmystyq kodekstiń 345-baby 4-bóligimen sotqa tústi. Sot Ramazan Infýrovty kinásiz dep tanyp, qylmystyq quram bolmaýyna baılanysty aqtaıdy. Qylmystyq jaýapqa zańsyz tartylǵany úshin keltirilgen zalaldy óndirip alýyna bolady. Ramazan Infýrov sot zalynan bosatylsyn. Jábirlenýshi taraptyń 50 mln teńge moraldyq, 500 myń teńge zańgerdiń shyǵynyn óndirý talap aryzy qaraýsyz qaldyrylsyn, — dedi sýdıa I. Ismaılova.
Jábirlenýshi taraptyń qorǵaýshysy sot úkimimen kelispeıtinin, apellıatsııalyq shaǵym túsiretinin aıtty. Al sottalýshy taraptyń qorǵaýshylary Alqa bılerge alǵysyn jetkizdi.
Budan buryn Astana — Qaraǵandy tasjolynda bes kólik soqtyǵysqanyn jazdyq.
