Aqtóbede jol-kólik oqıǵasy kóbeıdi
AQTÓBE. QazAqparat - Aqtóbe oblystyq polıtsııa departamenti jyldy qorytyndylady. Óńirde jol apaty kóbeıgen, dep habarlaıdy QazAqparat tilshisi.
Aqtóbe oblysynyń ákimi Ońdasyn Orazalınniń jáne oblys prokýrory Marat Qaıbjanovtyń qatysýymen jedel - qyzmettik jumystyń qorytyndysy, tártip pen zańdylyq máseleleri, azamattardyń ótinishterin qaraý jumysy qaraldy.
«Ótken jyly Aqtóbe oblysynda 11 myńǵa jýyq qylmys tirkeldi. Oblystaǵy jaǵdaı turaqty baqylaýda tur. Biraq bizge tergeý jáne jedel-izdestirý baǵytynda jumysty kúsheıtý qajet»- dedi oblystyq PD bastyǵy polıtsııa polkovnıgi Atyǵaı Arystanov.
Óńirde kisi óltirý qylmysy 16,4%, qaraqshylyq shabýyl 14,3% , tonaý 30,1%, bótenniń múlkin urlaý 32% azaıdy.
«Búgingi tańda máselelerdiń biri - jol-kólik oqıǵalarynyń kóbeıýi. Osy baǵytta ótken jyly 50-den astam jedel-profılaktıkalyq is-shara ótkizildi. Alaıda qabyldanǵan sharalarǵa qaramastan 2019 jyldyń qorytyndysy boıynsha jol-kólik oqıǵalarynyń sany 35,3% ( 643-ten 870-ke), qaza bolǵandar 15,8%, jaralanǵandar 47,4% ósti», - dedi oblystyq PD bastyǵynyń orynbasary Qanat Álıev.
Oblys ákimi Ońdasyn Orazalın quqyq buzýshylyq pen qylmystyń aldyn alý boıynsha atqarylǵan jumystary úshin oblystyq PD jeke quramyna alǵysyn bildirip, jasóspirimder arasyndaǵy qylmystyń aldyn alý sharalary negizinde jáne sybaılas-jemqorlyqqa qarsy áreket jóninde birqatar nusqaýlar berdi. Óńir basshysy aldaǵy ýaqytta da atqarýshy organ polıtsııanyń materıaldyq-tehnıkalyq jabdyqtalýyna kómek kórsetiletinine sendirdi.
