Aqtóbede jol-kólik apatynan 3 adam kóz jumdy
AQTÓBE. QazAqparat – Aqtóbede birneshe jol-kólik apaty bolyp, júrgizýshi men jolaýshylar kóz jumdy, dep habarlaıdy QazAqparat tilshisi.
Aqtóbeniń Mártók aýdany, Berezovka aýylynan 2 shaqyrym jerde «Lada-212140» avtokóliginiń júrgizýshisi rýlge ıe bola almaı qaldy. Kólik aýdanylyp, 39 jastaǵy jolaýshy alǵan jaraqatynan oqıǵa ornynda kóz jumdy. Al 41 jastaǵy jolaýshy jedel járdem aýrýhanasynda mert boldy. Júrgizýshi men taǵy bir jolaýshy aýrýhanada em qabyldap jatyr. Sot-medıtsınalyq jáne avtotehnıkalyq saraptamalar taǵaıyndaldy.
«Qylmystyq kodekstiń «Abaısyzda eki nemese odan da kóp adamnyń ólimine ákep soqqan kólik quraldaryn paıdalaný qaǵıdalaryn buzýy» baby boıynsha tergeý júrgizilýde. Sonymen birge, «Samara-Shymkent» tasjolynyń Hromtaý aýdany, Don aýylynyń mańynda taǵy bir jol-kólik oqıǵasy tirkeldi «Shevrolet-Krýz» avtokóliginiń júrgizýshisi Aqtóbeden Qyzylordanyń Aral qalasyna qaraı baǵyt alǵan. Ol da rýlge ıe bola almaı, qarsy qarsy baǵytqa shyǵyp ketken. Belarýs azamatynyń aıdap kele jatqan «Mersedes-Bens» markaly júk avtokóligimen soqtyǵysqan. Jol-kólik oqıǵasy nátıjesinde «Shevrolet-Krýz» avtokóliginiń júrgizýshisi Hromtaý qalasynyń ortalyq aýdandyq aýrýhanasyna jatqyzylyp, 30 jastaǵy jolaýshy alǵan jaraqatynan oqıǵa ornynda kóz jumdy. Atalǵan fakti boıynsha tergeý amaldary júrgizilýde», - dep habarlady oblystyq PD baspasóz qyzmetiniń jetekshisi Erbolat Sarqulov.
