Aqtóbede jol erejesin 308 ret buzǵan júrgizýshige 11 mln teńge aıyppul salyndy

AQTÓBE. KAZINFORM – Aqtóbelik turǵyn eki aı ishinde 308 ret jol erejesin buzdy. Ol sheteldik nómirli kólikpen júrip, jyldamdyqty asyrǵan. Sóıtip 11,5 mln teńge aıyppul arqalady.

Aqtóbede «Qaýipsiz jol» jedel-aldyn alý is-sharasy ótti. Polıtsııa qyzmetkerleri eki aıdyń ishinde jol erejesin 308 ret buzǵan, jyldamdyqty asyrǵan jas jigitti ustady. Sheteldik nómiri bar VAZ-2114 avtokóligin basqarǵan 35 jastaǵy qala turǵynynyń áreketi «Qorǵaý» júıesi arqyly anyqtaldy. Patrýldik polıtsııa batalonynyń qyzmetkerleri júrgizýshini ustap, kólik turaqqa qoıyldy. Aıyppuldardyń jalpy somasy 11 mln 573 myń teńgeni qurady. ​

– Júrgizýshiler ózderiniń jáne aınalasyndaǵylardyń qaýipsizdigi týraly oılanýy kerek. Sheteldik nómiri bar keıbir kólik júrgizýshileri jazadan qutylyp ketemin dep úmittenedi. Biraq olaı emes. Biz mundaı zań buzýshylardy anyqtap, olardy jaýapqa tartamyz, - dep atap ótti Aqtóbe qalasy polıtsııa basqarmasynyń bastyǵy Áset Qalıev.

Aıta keteıik, Aqtóbe oblysynda qar jaýǵanda jolda jol-kólik apaty kóbeıdi. Bir táýlikte 30 kólik soqtyǵysyp, 4-eýi aýdaryldy.