Aqtóbede jol erejesin saqtamaǵan júrgizýshiler 163 mıllıon teńge aıyppul tóleıdi
AQTÓBE. QazAqparat – Aqtóbede «Rýbej» apparattyq-baǵdarlamalyq kesheniniń kómegimen 16 myńnan astam jol qozǵalysy erejesin buzý deregi tirkeldi, dep habarlaıdy QazAqparat tilshisi.
Jol qaýipsizdigin qamtamasyz etý jáne kólik quraldarynyń Aqtóbe qalasyna kirýin-shyǵýyn baqylaý maqsatynda qalanyń 7 núktesine «Rýbej» apparattyq-baǵdarlamalyq kesheni ornatyldy. Júıe memlekettik nómirdi, kóliktiń markasy men túsin avtomatty túrde tanýǵa, sondaı-aq jyldamdyqty anyqtaýǵa arnalǵan.
«Aqtóbe-Orsk, Aqtóbe-Oral, Aqtóbe-Hromtaý, Aqtóbe-Mártók, Aqtóbe-Alǵa baǵytynda jyldamdyq ólshenedi. Jyl basynan beri 16 myńnan astam jol erejesi buzyldy. Barlyǵy 163 mıllıon teńgeden astam aıyppul salyndy», - dedi oblystyq PD baspasóz qyzmetiniń jetekshisi Erbolat Sarqulov.
