Aqtóbede jol boıyndaǵy jylytý jáne medıtsınalyq-qutqarý beketteri ázirlenip jatyr
AQTÓBE. KAZINFORM — Aqtóbe oblysynda 129 jylytý, 3 medıtsınalyq-qutqarý beketi daıyndaldy. Qazirgi kezde joldarǵa qajetti ınertti materıal tasymaldanyp jatyr.
Aqtóbede shuǵyl jıyn ótti. Onda birer kúnde óńirde jańbyr jaýyp, arty qarǵa ulasatyny aıtyldy. Sol kezde tótenshe jaǵdaılar qyzmeti, jolǵa jaýaptylar men medıtsına qyzmeti tolyq daıyn bolýy tıis. Oblys ákimi Ashat Shaharov turǵyndar tótenshe jaǵdaıǵa tap bolǵan mezette táýlik boıy qyzmet kórsetetin 109 Ahýaldyq ortalyǵy nemese 112 qutqarý nómirine habarlasa alatynyn eske saldy. Sondaı-aq, tirshilikti qamtamasyz etý nysandarynda kúrdeli jaǵdaılardy boldyrmaýǵa baǵyttalǵan barlyq sharany ýaqytyly qabyldaýdy mindettedi.
— Respýblıkalyq tas joldarǵa, ásirese «Aqtóbe-Hromtaý-Qarabutaq-Qostanaı» baǵytyndaǵy joldarǵa der kezinde qyzmet kórsetýge qajetti tehnıkalar men ınertti materıaldar qoryn daıyndaý asa mańyzdy. Tıisti apattyq-qutqarý qyzmetteriniń kúshteri men quraldarynyń daıyndyǵyn qamtamasyz etý qajet. Jol jabýǵa qatysty sheshim quzyrly organdarmen birlese sheshilý kerek,— dedi Ashat Shaharov.
Sondaı-aq, elektr qýatynyń avarııalyq ajyraýy qatty jel kúni jıi tirkeledi. Kúzdiń sýyǵynda adamdarǵa jaryqty úzdiksiz berý úshin energetıka salasynyń da ázir otyrǵany abzal. Ashat Shaharov oblystyq eergetıka basqarmasyna avarııalyq qyzmet kórsetý brıgadalary men rezervti generatorlardyń daıyndyǵyn qamtamasyz etýji júktedi. Al kásipkerlik basqarmasy aýdandardaǵy janar-jaǵarmaı jáne azyq-túlik qoryn baqylaýǵa alady. Tótenshe jaǵdaılar departamentiniń málimetinshe, qazirgi kezdk 1567 adam jáne 455 birlik tehnıkanyń ázir. Respýblıkalyq jáne oblystyq mańyzy bar trassalarda qar qursaýynda qalǵan azamattarǵa kómek kórsetý úshin 129, onyń ishinde Samara-Shymkent tas jolynyń boıynda 46 jylytý pýnkti bar. Qysta jumys isteıtin 3 trassalyq medıtsınalyq-qutqarý pýnkti daıyn.
Aqtóbe oblysy ákiminiń baspasóz qyzmetiniń habardaýynsha, Samara-Shymkent avtojolynyń 791-819 shaqyrymynda «Sıne Mıdas Stroı» JShS úzdiksiz jáne qaýipsiz jol qozǵalysyn uıymdastyrý maqsatynda 10 arnaıy tehnıkasyn jumyldyryp, taıǵaqqa qarsy materıaldar daıyndap jatyr. «QAJservıs» JShS Aqtóbe oblystyq fılıalynyń 6 jol paıdalaný bólimshesi, 12 jol paıdalaný pýnkti respýblıkalyq jáne halyqaralyq mańyzy bar avtomobıl joldary jelisiniń 1752 shaqyrymyna kútip-ustaý jumystaryn atqarady.
Aıta keteıik, Aqmola oblysynyń polıtseıleri aýa raıynyń qolaısyzdyǵyna baılanysty trassalardy kúsheıtilgen patrýldeýge kiristi.
