Aqtóbede jol belgilerin salýǵa jaýapty sheneýnik 8 jylǵa sottaldy
AQTÓBE. KAZINFORM – Jol qozǵalysy qaýipsizdigi men tsıfrlyq tehnologııalardy qamtamasyz etý ortalyǵynyń basshysy Abzal Tılmaǵambetov 8 jylǵa bas bostandyǵynan aıyryldy.
№2 Aqtóbe qalalyq sotynda Jol qozǵalysy qaýipsizdigi men tsıfrlyq tehnologııalardy qamtamasyz etý ortalyǵynyń basshysy Abzal Tılmaǵambetovke qatysty istiń úkimi oqyldy. Abzal Tılmaǵambetov «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıypty dep tanylyp, 8 jylǵa bas bostandyǵynan aıyryldy. Ol jazasyn qaýipsizdigi ortasha túzetý mekemesinde óteıdi jáne ómir boıyna memlekettik, kvazımemlekettik mekemede jumys isteı almaıdy.
Sonymen birge sottalýshy Aslan Kýsýmov «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıypty dep tanylyp, 7 jylǵa bas bostandyǵynan aıyryldy. Ol 10 jyl belgili bir basshylyq qyzmetti atqara almaıdy.
- Abzal Tılmaǵambetov 2023 jyldyń sáýir-qarasha aılary aralyǵynda qyzmettik ókilettigin jeke jáne bógde adamdardyń múddesi úshin paıdalanyp, memlekettik satyp alýlardy uıymdastyrǵan. Ol «A» JShS-niń memlekettik satyp alýǵa qatysýyn qamtamasyz etip, jol belgilerin salýǵa qosymsha kelisimshart jasaǵan. Jumystar oryndalmaǵanyna qaramastan jalǵan aktilerge qol qoıyp, nátıjesinde memleketke 272 mln teńge kóleminde iri zalal keltirilgen. Sottalýshylardyń kinási kýágerlerdiń jaýabymen jáne is qujattarymen rastaldy, - dedi Aqtóbe qalasynyń №2 sotynyń baspasóz qyzmeti.
Eske salsaq, Aqtóbe qalalyq turǵyn úı-kommýnaldyq sharýashylyq bóliminde tórt jyl buryn basshynyń mindetin atqarǵan Janbolat Qusmuhambetov 3 jylǵa bas bostandyǵynan aıyryldy. Ol velojoldyń jobalyq-smetalyq qujaty bolmasa da, alǵashqy kelisimshartqa qol qoıǵan.