Aqtóbede jol apatynan zardap shekken jumysshylardyń jaǵdaıy aýyr
AQTÓBE. QazAqparat - Aqtóbede jol-kólik apaty bolyp, 3 adam kóz jumdy, 10 adam aýrýhanaǵa jetkizildi. Qazirgi ýaqytta jaǵdaıy asa aýyr 2 adam oblystyq jedel járdem aýrýhanasynda em qabyldap jatyr, dep habarlaıdy QazAqparat tilshisi.
Aqtóbedegi «Jańajol-Severnaıa Trýva» tasjolynda kólik apaty bolyp, jumysshylar mingen avtobýs pen sý tasıtyn mashına soqtyǵysty. Úsh adam oqıǵa ornynda kóz jumdy.
«18 naýryz kúni saǵat 7:45-te jol-kólik oqıǵasy boldy. Barlyǵy 14 adam zardap shekti, «KSB Grýpp» kúzet qyzmetiniń 2 jumysshysy kóz jumdy. Sonymen qatar, ekeýi aýyr jaǵdaıda aýrýhanaǵa jetkizildi. Qazirgi kezde qaıǵyly jaǵdaı boıynsha habarlama tústi, tekserý júredi. Kúzet kompanııasy Atyraý oblysyna qaraǵanymen, jumysshylardyń bári aqtóbelik», - dedi Aqtóbe oblystyq eńbek ınspektsııa basqarasynyń ınspektory Ásel Bashkenova.
Jaǵdaıy asa aýyr naýqastar oblys ortalyǵyndaǵy aýrýhanaǵa jetkizildi. Dárigerler 2 apta boıy em júrgizetinin habarlady.
«Jol-kólik oqıǵasy kezinde zardap shekken eki naýqas Aqtóbe jedel járdem aýrýhanasyna jetkizildi. Naýqastardyń jaǵdaıy aýyr. Birden jansaqtaý bólimine jatqyzyldy. Bir naýqasta bas-mı jaraqaty bar, ókpesine zaqym keldi. Qazir alǵashqy kómek kórsetildi. Naýqas esin jıyp, sóıleı alady. Ekinshi naýqastyń da jaǵdaıy aýyr. Ol da bas-mı jaraqatyn alǵan, is-qurylysy zaqymdanǵan. Dárigerler ota jasaıdy», - dedi Aqtóbe jedel járdem aýrýhanasynyń bólim meńgerýshisi Jakııa Baızýllın
