Aqtóbede jol apatynan shetel azamaty qaza tapty

AQTÓBE. QazAqparat - Aqtóbede jol apatynan sheteldik qaza tapty, dep habarlaıdy QazAqparat polıtsııaǵa silteme jasap.

26 tamyz kúni saǵat 14:00-de MAN-TGX júk kóligin júrgizip kele jatqan 24 jastaǵy Ózbekstan azamaty Samara-Shymkent avtojolynyń Qyzylorda oblysynyń shekarasyna jaqyn jerinde joldyń qarsy qozǵalysqa arnalǵan jaǵyna shyǵyp ketken.

Sóıtip Reseı Federatsııasynyń 51 jastaǵy azamatynyń basqarýyndaǵy Lada Largus avtokóligimen soqtyǵysqan.

Saldarynan Lada júrgizýshisi alǵan jaraqatynan oqıǵa ornynda qaıtys boldy.

Onyń kámeletke tolmaǵan jolaýshysy túrli jaraqatpen Yrǵyz aýdanynyń ortalyq aýrýhanasyna jatqyzyldy.

Osy fakti boıynsha QR QK 345-baby 3-bóligi boıynsha qylmystyq is qozǵaldy.

Aldyn ala boljam boıynsha, MAN-TGX júrgizýshisi kólik quralyn sharshańqy kúıde basqarǵan.