Aqtóbede jol apatynan kóz jumǵan er adamnyń jaqyndary izdestirilýde
AQTÓBE. QazAqparat - Aqtóbe oblystyq ІІD baspasóz qyzmeti jol-kólik oqıǵasy kezinde qaza bolǵan Qaıyrǵalı Tasqalıevtiń týǵan-týystaryn izdep jatyr, dep habarlaıdy QazAqparat tilshisi.
Aqtóbe oblystyq Іshki ister departamenti 64 jastaǵy Qaıyrǵalı Tasqalıevtiń týǵan-týystaryna izdeý saldy. Sebebi, 2 qarasha kúni Aqtóbe qalasynda jol-kólik apaty bolyp, júrgizýshi er adamdy kóligimen qaǵyp ketken. Zınchenko kóshesinen Zaýyt kóshesine qaraı baǵyttalǵan kólik joldy kesip ótpek bolǵan adamdy qaqqan. Er adam jedel járdem aýrýhanasyna jetkizilgenimen, bir kúnnen soń kóz jumdy.
«Jábirlenýshi alǵan jaraqattary saldarynan kóz jumdy. Biz Qaıyrǵalı Tasqalıevtiń týǵan-týystaryn izdestirip jatyrmyz. Ol Batys Qazaqstan oblysy, Kaztalov aýdanynda turǵan. Biletin adamdar bolsa 8 (7132) 936-404 nemese 8-776-774-0926 telefondaryna qońyraý shalýdy suraımyz»,- dep habarlady oblystyq ІІD-niń baspasóz ortalyǵynan.
Aıta keteıik, osy oqıǵaǵa qatysty Qylmystyq kodekstiń ««Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzyp, abaısyzda eki adamnyń ólimine ákep soqqan is-áreketi» baby boıynsha iz qozǵaldy, tergeý júrip jatyr.
