Aqtóbede jol apatynan 2 adam kóz jumdy
AQTÓBE. QazAqparat – Aqtóbe – Atyraý jolynda eki kólik soqtyǵysyp, eki adam kóz jumdy, dep habarlaıdy QazAqparat tilshisi.
Aqtóbe-Atyraý tasjolynyń Alǵa aýdany Tamdy aýyly mańynda «ÝAZ-patrıot» avtokóliginiń júrgizýshisi qarsy kele jatqan kólikterge kedergi keltirmeıtinine kóz jetkizbeı basyp ozyp, «Lada - Largus» kóligimen soqtyǵysqan. Joldyń bul bóliginde jóndeý jumystary júrgizilip jatyr jáne ol týraly belgiler men qorshaýlar ornatylǵan.
«Apat saldarynan «Lada – Largus» avtokóliginiń eki jolaýshysy alǵan jaraqattarynan qaıtys boldy. Aqtóbe oblysynyń Polıtsııa departamenti barlyq júrgizýshini jol-kólik oqıǵalarynyń aldyn alýǵa jáne olardy boldyrmaýǵa baǵyttalǵan jol qozǵalysy erejelerin múltiksiz saqtaýǵa shaqyrady», - dedi oblystyq PD baspasóz qyzmeti.
Aıta keteıik, bıyl óńirde 374 jol-kólik oqıǵasy tirkeldi. Saldarynan 74 adam kóz jumsa, onyń 10-y – kámelet jasqa tolmaǵan balalar. Túrli jaraqat alǵandar sany 500-den asady.
Oblys boıynsha 34 adam qylmystyq jaýapqa tartyldy. Olarǵa qatysty 6 aıdan 5 jylǵa deıingi merzimge bas bostandyǵynan aıyrýǵa úkim shyǵaryldy jáne jazasyn óteý úshin bas bostandyǵynan aıyrý oryndaryna jiberildi.
