Aqtóbede jol apatyna túsken eki bala ókpeni jasandy jeldetý apparatyna qosyldy

AQTÓBE. QazAqparat – Aqtóbege Densaýlyq saqtaý vıtse-mınıstrimen birge úsh dáriger qosa keldi. Olar ota jasalǵan balalardy qarap shyqty, dep habarlaıdy QazAqparat tilshisi.

Búgin Aqtóbe óńirlik kommýnıkatsııa qyzmetinde jol-kólik oqıǵasyna qatysty baspasóz máslıhaty ótti.

Onda oblystyq densaýlyq saqtaý basqarmasy, oblystyq dene shynyqtyrý jáne sport basqarmasynyń basshysy men polıtsııa ókili mán-jaıdy habarlady.

«Úsh bala esin biledi. Olarǵa travmatologııa, hırýrgııalyq ota jasaldy. Eki bala basynan jaralanǵan soń uıyqtatyp, ókpeni jasandy jeldetý apparatyna qosyp qoıdyq. Úsh-tórt kún osy qalypta bolyp, keıin oıatamyz. Bizge Astanadan mamandar keldi. Densaýlyq saqtaý vıtse-mınıstri janyna úsh dárigerdi ertip ákeldi. Olar: travmatolog, neırohırýrg, anestezıolog-reanımatolog. Tańǵa deıin balalardy baqylap, jasalǵan otanyń sátti shaqqanyn aıtty. Balalardyń janyna ata-analary da kirip shyqty», - dedi oblystyq densaýlyq saqtaý basqarmasynyń basshysy Rústem Isaev.

Aıta keteıik, jattyqtyrýshy áli de esin jımady.

«Jigittiń jaǵdaıy óte aýyr. 6-7 omyrtqasy synyp, mıy shaıqalǵan. Bas terisi jarylǵan. Jaǵdaıy óte aýyr. Dári-dármek jetkilikti», - dedi Rústem Isaev.

Onyń aıtýynsha, balalar dertti jeńil ótkeredi jáne tez aıaqqa turyp ketedi.

Eske salsaq, 17 jeltoqsan kúni Aqtóbe-Bolgarka-Shubarqudyq aýylynda jol-kólik apaty boldy. Balalar túrli jaraqat alyp, olarǵa shuǵyl ota jasaldy.

Basty foto: Aqtóbe oblysynyń PD baspasóz qyzmeti