Aqtóbede jol apaty kezinde jolaýshy kóz jumdy

AQTÓBE. QazAqparat – Aqtóbedede jol-kólik apaty kezinde tórt adam aýrýhanaǵa túsip, jolaýshy kóz jumdy, dep habarlaıdy QazAqparat tilshisi.

Oqıǵa Shubarqudyq aýyly men Qandyaǵash qalasy arasynda boldy. VAZ-2114 avtokóliginiń 27 jastaǵy júrgizýshisi aýyldan Qandyaǵash qalasy baǵytynda kele jatyp, rýldi basqara almaı, qarsy qozǵalysqa arnalǵan jolaqqa shyǵyp ketken. Sol kezde «Nissan Teana» avtokóligimen soqtyǵysqan.

«Jol-kólik oqıǵasy saldarynan eki júrgizýshi men eki jolaýshy Temir ortalyq aýdandyq aýrýhanasyna jatqyzyldy. Keıin «Nissan Teana» avtokóliginiń jolaýshysy qaıtys bolǵany anyqtaldy», - dep habarlady oblystyq PD baspasóz qyzmeti.

Aqtóbe oblystyq densaýlyq saqtaý basqarmasynyń basshysy Rústem Isaevtiń málimetine súıensek, barlyǵy bes adamǵa kómek kórsetilgenimen, oqıǵa ornynda 48 jastaǵy áıel kóz jumǵan. Sonymen birge kólik ishinde bolǵan adamdardyń kóbi bas-mı jaraqatyn alyp, aýrýhanada em qabyldap jatyr.

Eske salsaq, Aqtóbede sońǵy ýaqytta jol-kólik apaty jıilep ketti. Keshe qalada ájesi men nemeresin kólik qaǵyp ketip, qarııa oqıǵa ornynda kóz jumdy.