Aqtóbede jol apaty kezinde ózbekstandyq áıel kóz jumdy

AQTÓBE. QazAqparat – Aqtóbe-Atyraý tasjolynda jol apaty bolyp, ózbekstandyq eki áıel aýrýhanaǵa tústi. Onyń biri jansaqtaý bóliminde kóz jumdy, dep habarlaıdy QazAqparat tilshisi.

Oqıǵa Aqtóbe – Atyraý tasjolynyń 284-i shaqyrymynda boldy. «Lada Largus» avtokóliginiń 42 jastaǵy júrgizýshisi jol qurylysy jumystary júrgizilip jatqan aýmaqqa kirip, nátıjesinde jol jıeginiń oń jaǵyna qaraı aýdarylyp ketken.

«Jol-kólik oqıǵasy saldarynan ózbekstandyq eki jolaýshy Baıǵanın aýdanynyń ortalyq aýrýhanasyna jatqyzyldy. Biraq bireýi esin jımastan kóz jumdy. Aqtóbe oblysynyń polıtsııa departamenti jol qozǵalysynyń búkil qatysýshylaryn jol erejelerin saqtaýǵa shaqyrady», - dep habarlady oblystyq PD baspasóz qyzmeti.

Eske salsaq, shilde aıynyń sońynda Samara-Shymkent tasjolynda iri jol-kólik apaty bolyp, 6 adam kóz jumdy.

Bul - Yrǵyz aýdany Qalybaı aýylynyń mańy. «Honda-Fıt» markaly avtokóliginiń 32 jastaǵy júrgizýshisi jolda qarsy betke shyqqan. Rýlde Qyrǵyzstan Respýblıkasynyń azamaty boldy.

Saldarynan Yrǵyz aýdanynyń 33 jastaǵy turǵyny basqaryp kele jatqan «Lada-Largýs» markaly avtokóligimen soqtyǵysqan. Jol-kólik oqıǵasy saldarynan «Lada-Largýs» markaly avtokóliginiń júrgizýshisi men 4 jolaýshy oqıǵa ornynda kóz jumdy.

Sonymen qatar, «Honda-Fıt» avtokóliginiń jolaýshysy mert boldy.

«Honda-Fıt» avtokóliginiń júrgizýshisi 30 jastaǵy jolaýshymen birge túrli jaraqatpen Yrǵyz aýdandyq aýrýhanasyna jatqyzyldy.