Aqtóbede jol apatynan úsh adam mert boldy
AQTÓBE. KAZINFORM - Aqtóbe - Atyraý tasjolynyń Alǵa aýdany aýmaǵynda jol apaty boldy. Oqıǵa ornynda «VAZ-2115» avtokóliginiń júrgizýshisi men eki jolaýshy kóz jumdy. Onyń bireýi jasóspirim.
Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, jedel járdem brıgadasy eki adamnyń ólimin tirkedi. Alǵa aýdandyq aýrýhanasyna 4 adam jetkizildi.
- 2018 jyly týǵan bala jabyq bas-mı jaraqatyn alǵan. Jaǵdaıy turaqty, biraq aýyr. Kólik ishinde bolǵan 16 jastaǵy bozbalanyń da jaǵdaıy turaqty, biraq aýyr. Sonymen birge 13 jastaǵy jasóspirim de jaraqattandy. Ashyq bas mı jaraqatymen túsken bala jansaqtaý bóliminde kóz jumdy. 35 jastaǵy er adam da dál sondaı jaraqat alǵan. Taǵy bir adam dárigerge qaralýdan bas tartty,- dedi oblystyq densaýlyq saqtaý basqarmasynyń baspasóz qyzmeti.
Aqtóbe oblystyq Polıtsııa departamenti baspasóz qyzmetiniń habarlaýynsha, oqıǵa búgin saǵat 16:20-da boldy. Alǵa aýdanynyń Bestamaq aýyly mańynda «VAZ-2115» jáne «GAZel» avtokólikteri soqtyǵysty.
- Jol-kólik apaty kezinde «VAZ-2115» avtokóliginiń júrgizýshisi men jolaýshy kóz jumdy. Jasóspirim aýrýhanada qaıtys boldy. Osy kólik ishinde bolǵan úsh jolaýshy aýrýhanada jatyr,- dep habarlady Aqtóbe oblystyq Polıtsııa departamentiniń baspasóz qyzmeti. Jaraqat alǵandardyń jaǵdaıy turaqtalǵan soń olar oblys ortalyǵyndaǵy aýrýhanaǵa jetkiziledi.
Eske salsaq, Samara-Shymkent tasjolynda jol apaty bolyp, 8 adam kóz jumdy. Onyń beseýi bala.
Ótken aptada dál osy trassada úsh jol apaty tirkelip, 12 adam qaza tapty.
