Aqtóbede jol apatynan taǵy da eki adam kóz jumdy
AQTÓBE. KAZINFORM — Samara — Shymkent tasjolynyń Dóń aýyly mańynda júk jáne jeńil kólik soqtyǵysty. Saldarynan 2 adam kóz jumyp, úsheýi aýrýhanaǵa jetkizildi.
Oqıǵa búgin saǵat shamamen 6:00–de Hromtaý aýdany Dóń kentiniń mańynda boldy. Aqtóbe oblystyq Polıtsııa departamenti baspasóz qyzmetiniń habarlaýynsha, Lada Largus avtokóligi men Volvo júk kóligi soqtyǵysty. Oqıǵa ornynda Lada Largus kóliginiń júrgizýshisi men bir jolaýshy qaıtys boldy.
Qazirgi ýaqytta sotqa deıingi tergep-tekserý bastalyp, barlyq qajetti saraptama júrgizilip jatyr.
— Hromtaý aýdandyq aýrýhanasynyń jedel medıtsınalyq kómek brıgadasy oqıǵa ornyna jetken kezde eki adamnyń ólimin tirkedi. Úsh adam Hromtaý qalasyna jetkizildi. Olardy kezekshi hırýrg dáriger qarap, ambýratorly túrde em qabyldaýǵa jiberdi. Taǵy eki adam dárigerge qaralmady, — dep habarlady Aqtóbe oblystyq Densaýlyq saqtaý basqarmasynyń baspasóz qyzmeti.
Eske salsaq, 7 tamyz kúni Aqtóbeniń Samara — Shymkent tasjolynda jeńil jáne júk kóligi betpe-bet soqtyǵysyp, 8 adam mert boldy. Olardyń arasynda Mańǵystaýdaǵy týrnırge jolǵa shyqqan oqýshylar bar.
Sol kúni túnde taǵy da jaǵdaı qaıtalanyp, júk jáne jeńil kólie soqtyǵysty. Saldarynan eki adam kóz jumyp, anasy men eki balasy aýrýhanaǵa tústi.
