Aqtóbede jol apatynan alty adam opat boldy
AQTÓBE. KAZINFORM — Oqıǵa Qandyaǵash qalasy mańynda boldy. Toyota Camry avtokólikteri soqtyǵysqan kezde eshkim aman qalmady.
Aqtóbe oblystyq polıtsııa departamenti baspasóz qyzmetiniń habarlaýynsha, qazir qylmystyq is qozǵalyp, tergeý júrip jatyr.
— Aqtóbe — Astrahan avtojolynyń 94-shaqyrymynda, Muǵaljar aýdany Qandyaǵash qalasyna jaqyn jerde eki Toyota Camry avtokóligi soqtyǵysty. Jol-kólik oqıǵasy saldarynan alty adam qaza tapty. Atalǵan fakti boıynsha qylmystyq is qozǵaldy. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan sotqa deıingi tergeý júrgizilip jatyr. Polıtsııa qaza bolǵandardyń týǵan-týystary men jaqyndaryna qaıǵyryp kóńil aıtady, — dep habarlady vedomstvonyń baspasóz qyzmeti.
Polıtsııa júrgizýshilerdi jol qozǵalysy erejelerin qatań saqtaýǵa, kólik jyldamdyǵyn qaýipsiz deńgeıde tańdaýǵa jáne jolda barynsha muqııat bolýǵa úndedi.
Eske salaıyq, buǵan deıin Abaı oblysynda jol apatynan tórt adam kóz jumdy.
Chevrolet Nexia avtokóliginiń júrgizýshisi aldynda kele jatqan «Gazel» kóligin basyp ozý kezinde qarsy baǵyttaǵy qozǵalys jolaǵyna shyǵyp ketip, sol jerde Kia Rio avtokóligimen soqtyǵysqan.
