Aqtóbede joǵalyp ketken jas kelinshekti polıtsııa jan-jaqtan izdep jatyr
AQTÓBE. QazAqparat - Aqtóbede jas kelinshekti izdeý jumystary jalǵasyp jatyr. Egiz qyzdyń anasy jumys ornynan 1 saǵatqa suranyp ketkeni belgili boldy, dep habarlaıdy QazAqparat tilshisi.
Aqtóbe oblystyq ІІD baspasóz qyzmetiniń habarlaýynsha, Aıdana Muhammedjanovanyń joǵalǵany týraly aryz 30 tamyz kúni Elek polıtsııa bólimine kelip túsken. 24 jastaǵy jas kelinshek «Altyn bala» balabaqshasyndaǵy jumysyn tastap, shyǵyp ketken.
«2 qyrkúıek kúni izdeý jumystary bastaldy. Jedel izdestirý jumystary jalǵasyp jatyr. Joǵalǵan adamnyń mekenjaıy anyqtalýda»,- dep habarlady oblystyq ІІD baspasóz qyzmeti.
Al balabaqsha meńgerýshisi 3 jyl boıy jumys istegen tárbıeshiniń 1 saǵatqa shyǵyp ketkenin kesh bilgen.
«Altyn bala» balabaqshasynda jumys istegende eshqandaı óreskel qylyq kórsetken joq. Úlgili tárbıeshi, ata-analarmen jaqsy til tabysady. Balalardy jaqsy kóredi. 28 qyrkúıek kúni Aıdana Muhammedjanova jumysqa kelip, janyndaǵy tárbıeshige «meńgerýshiden surandym, 1 saǵatta qaıtyp kelemin» dep ketip qalǵan. Balalar qaraýsyz qalǵan joq. Birinshi kezektegi tárbıeshi barlyq mindetti ózi alyp júr. Aıdana jumysqa oralmaǵan soń akt jasap, 3 qyrkúıek kúni úıine hat joldandy»,- deıdi balabaqsha meńgerýshisi Dınara Týrebaeva.
Eske salsaq, Aıdana Muhammedjanovanyń 3 jasar egiz qyzy bar. Joǵalǵan kúnnen beri ol baılanysqa shyqpaǵan.
