Aqtóbede joǵalǵan mektep oqýshysynyń múrdesi qamys arasynan tabyldy
AQTÓBE. QazAqparat - Aqtóbede 13 sáýir kúni dalaǵa shyǵyp, keıin úıine oralmaǵan Birjan Ersaıynov bes kún boıy izdestirildi. Qutqarýshylar balanyń denesin búgin tańerteń ózennen tapty, dep habarlaıdy QazAqparat tilshisi.
Buǵan deıin 13 sáýir kúni mektep oqýshysynyń joǵalyp ketkenin habarlaǵan bolatynbyz. Birjan Ersaıynov oıynǵa shyǵyp, keıin oralmaǵan. Іzdeý jumystaryna aýyl adamdary men muǵalimder, eriktiler qatysty. Al qutqarýshylar ózen aǵysynyń qattylyǵy men sý laı degen sebeppen súńgýirlerdiń jumysyna kedergi kelgenin jetkizdi. Olar motorly qaıyqpen izdep, keıin ózenniń aýylǵa aparar jolyn sholyp shyqty . Al búgin tańerteń balanyń denesi Jińishke ózenindegi qamys arasynan tabyldy.
«Balanyń múrdesi Jińishke ózeninen tabyldy. Qutqarýshylar múrdeni balalar oınap, joǵalǵan jerden 800 metr qashyqtyqtan, qamys arasynan alyp shyqty. Ózenniń deńgeıi tómen túsip, bala denesi sý betine qalqyp shyqqan. Múrdesi ishki ister organdaryna berildi»,- dedi Aqtóbe oblystyq TJD jedel-qutqarý jasaǵy kezekshi-dıspetcherlik qyzmetiniń jetekshisi Oksana Kıchıgına.
