Aqtóbede joǵalǵan balany izdeý jumystary shekara aýmaǵynda da júrip jatyr
AQTÓBE. KAZINFORM – Elek ózeni Reseıdiń Orynbor oblysy aýmaǵyna qaraı aǵady. Sondyqtan tótenshe jaǵdaılar qyzmeti kórshiles áriptesterine de habar berdi.
Aqtóbe oblysy Mártók aýdany Saryjar aýylynyń 10 jastaǵy turǵyny Mansur Samatov áli tabylmaı jatyr. Іzdeý jumystary eki aptaǵa sozyldy. Tótenshe jaǵdaılar departamentiniń qyzmetkerleri, 20982 áskerı bólimi men polıtsııa, jergilikti atqarýshy organ ókilderi men eriktiler, jergilikti turǵyndar da kómekke bardy.
- Qutqarý jumystaryna qazirgi tańda barlyǵy 110 adam jumyldyryldy. Onyń ishinde qutqarýshylar, súńgýirler, kınologııalyq eseptop jáne medıtsına qyzmetkeri bar.
Sonymen qatar 21 tehnıka, 11 júzý quraly jáne 6 ushqyshsyz ushý apparaty tartylǵan. Kún saıyn súńgýirler sý aıdynda 30–35 shaqyrym aýmaqty qamtıdy. Júzý quraldary arqyly 25–30 km júzip ótedi.
Al jaıaý toptar 15–20 shaqyrymdyq jaǵalaýdy qaraıdy. Drondardyń kómegimen 10–15 km aýmaq zertteledi. Sondaı-aq eholot apparaty da belsendi túrde qoldanylyp jatyr. Ózendegi qatty aǵys, qamys pen ósimdiktiń qalyńdyǵy jáne laı sý qıyndyq keltirip tur. Іzdestirý-qutqarý jumystary táýlik boıy kúndiz de, túnde de jalǵasyp jatyr,- dep habarlady Aqtóbe oblystyq TJD baspasóz qyzmeti.
Sonymen birge Aqtóbe oblystyq TJD kórshiles Reseı óńirine de habar berdi. Jergilikti atqarýshy organ ókilderi, shekarashylar men qutqarýshylar Orynbor oblysynyń Aqbulaq aýyly mańyndaǵy Elek ózeninde de izdeý jumystaryn júrgizip jatyr.
Eske salsaq, 29 naýryz kúni keshkilik Martók aýdandyq polıtsııa bóliminiń kezekshi bólimine 2016 jyly týǵan balanyń joǵalǵany týraly habarlama tústi. Aldyn ala málimet boıynsha, bala sýǵa qulap ketýi múmkin.
