Aqtóbede joǵalǵan balany izdeý úshin 10 top quryldy
AQTÓBE. KAZINFORM — Qurylǵan top Saryjar aýylynan Mártók aýylyna deıingi aralyqty qarap shyǵady. Іzdeý sýda jáne jaǵada qatar júrgizilip jatyr.
Aqtóbe oblystyq TJD baspasóz qyzmetiniń habarlaýynsha, 10 jastaǵy Mansur Samatovty izdeý kezinde úsh súńgýir toby 23 ret sýǵa túsip, shamamen 550 metr jerdi tekserdi. Táýlik ishinde bes matorly qaıyqtyń kómegimen Saryjar aýylynan Sarjansaı aýylyna deıingi 45 shaqyrym aýmaq qamtyldy. Sonymen birge jaǵalaýda shamamen 20–22 shaqyrym jer tekserildi. Jalpy izdestirý-qutqarý jumystaryna shamamen 90 adam, 30-dan astam tehnıka, 6 ushqyshsyz ushý apparaty, 7 júzý quraly jáne TJM-niń «Qazavıaqutqarý» tikushaǵy tartyldy. Bul jumys áli de jalǵasyp jatyr.
— Іzdeý jumystary ekinshi kún qatarynan júrip jatyr. Jospar boıynsha 10 top qurylyp, oqıǵa bolǵan Saryjar aýylynan Mártók aýylyna deıin júrip ótemiz. Ózenniń arǵy beti men bergi beti, ózen túgel tekseriledi. Kóktem bolǵan soń ózendegi sý aǵysy kúsheıip tur. Bul izdeý jumysyn qıyndatady, — dedi Aqtóbe oblystyq PD bastyǵynyń orynbasary Ardana Saımaǵambetov.
Buǵan deıin habarlaǵanymyzdaı, 29 naýryz kúni keshkilik Martók aýdandyq polıtsııa bóliminiń kezekshi bólimine 2016 jyly týǵan balanyń joǵalǵany týraly habarlama tústi. Aldyn ala málimet boıynsha, bala sýǵa qulap ketýi múmkin.